XX-قىسقى سۋردليمپيادا: شاڭعىشىلار جۇلدەگە ءبىر قادام جەتپەي قالدى

تۇركيانىڭ ەرزۋرۋم قالاسىندا 2-12 ناۋرىز ارالىعىندا وتكەن XX-قىسقى سۋردليمپيادا ويىندارى ءوز مارەسىنە جەتتى.

ءتورت جىلدا ءبىر رەت وتەتىن دۇرمەكتى دوداعا 36 مەملەكەتتەن 1 000-نان استام سپورتشى ونەر كورسەتتى. وعان قازاقستاننان شاڭعى جارىسى، سنوۋبورد جانە شاحمات سپورت تۇرلەرىنەن 26 سپورتشى قاتىستى.

بۇعان دەيىن حابارلانعانداي، قىسقى ويىنداردا قازاقستان ەرلەر قۇراما كومانداسى كلاcسيكالىق شاحماتتان قولا مەدال جەڭىپ الدى.

جارىستا قۇرامانىڭ شاحماتشىلارى يتاليا، گەرمانيا، سەربيا ويىنشىلارىن جەڭىپ، ۋكراينا مەن پولشا كوماندالارىمەن تەڭ ويىن كورسەتىپ، تەك حورۆاتياعا عانا ەسە جىبەردى.

بۇل ناتيجەلەرمەن كوماندامىز 7 تۋردان كەيىن 10 ۇپاي جيناقتاپ، ءۇشىنشى ورىنعا ورنالاستى. التىن مەدال حورۆاتيا قۇراماسىنا (12 ۇپاي)، ال كۇمىس جۇلدە پولشا كومانداسىنا (11 ۇپاي) بۇيىردى.

ۇلتتىق قۇراما ساپىندا سۇلتان قوجاحمەتوۆ، ساماجان كەتتەبەكوۆ، ماكسيم روجكوۆ، امانگەلدى ناۋرىزعاليەۆ، مەيىرمان پەرنەەۆ پەن ۆيكتور ماكسيمەنكو وينادى.

ءۇشىنشى ورىنعا تارتىستا ءبىزدىڭ باستى قارسىلاستارىمىز ۋكراينانىڭ سپورتشىلارى بولدى. سوڭعى ساتكە دەيىن جەڭىمپاز كىم بولاتىنى بەلگىسىز ەدى. اقىر اياعىندا، قازاقستان مەن ۋكراينانىڭ ۇپايلارى تەڭ شىقسا دا، كوەففيتسيەنت بويىنشا ءبىز العا شىقتىق. بۇل جەڭىس ۇلكەن ەڭبەكتىڭ جەمىسى. ەلىمنىڭ تۋىن جوعارى كوتەرە العانىما قۋانىشتىمىن، – دەدى سۇلتان قوجاحمەتوۆ.

وعان قوسا، قىسقى سۋردليمپيادا ويىندارىندا شاڭعىشى ۆلاديسلاۆ گريشين 10 كم قاشىقتىقتا 16 سپورتشىنىڭ اراسىندا ءتورتىنشى ورىنعا يە بولدى. جۇپتىق سپرينتتە ەرلەر جانە ايەلدەر قۇراما كوماندالارى دا ءتورتىنشى ورىنعا تۇراقتادى.

دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ ديرەكتورىنىڭ ورىنباسارى ومىرزاقوۆ ءادىلحان بولاتحان ۇلىنىڭ ايتۋىنشا، قازاقستان سپورتشىلارى قىسقى سۋردليمپيادا ويىندارىنا ءۇشىنشى رەت قاتىستى.

سپورتشىلارىمىز مۇنداي ماڭىزدى جارىستارعا قاتىسىپ، تاجىريبە جيناقتاپ، ءوز مۇمكىندىكتەرىن سىناپ كوردى. كوش جۇرە تۇزەلەدى دەمەكشى سۋردو سپورتشىلارىمىزدىڭ الار اسۋلارى ءالى الدا دەپ سەنەمىن، – دەدى ول.

سونىمەن بىرگە ول ەلىمىز بيىلعى جارىسقا ءۇشىنشى رەت قاتىسسا دا شاحمات، سنوۋبورد پەن شاڭعى جارىسىنا 25 سپورتشى اپارىپ جامان ونەر كورسەتپەگەنىن ايتتى.

قۇرالاي ءاشىمحانوۆا،

استانا