XX-qysqy Sýrdlımpıada: shańǵyshylar júldege bir qadam jetpeı qaldy

Túrkııanyń Erzýrým qalasynda 2-12 naýryz aralyǵynda ótken XX-qysqy Sýrdlımpıada oıyndary óz máresine jetti.

Tórt jylda bir ret ótetin dúrmekti dodaǵa 36 memleketten 1 000-nan astam sportshy óner kórsetti. Oǵan Qazaqstannan shańǵy jarysy, snoýbord jáne shahmat sport túrlerinen 26 sportshy qatysty.

Buǵan deıin habarlanǵandaı, qysqy oıyndarda Qazaqstan erler qurama komandasy klacsıkalyq shahmattan qola medal jeńip aldy.

Jarysta quramanyń shahmatshylary Italııa, Germanııa, Serbııa oıynshylaryn jeńip, Ýkraına men Polsha komandalarymen teń oıyn kórsetip, tek Horvatııaǵa ǵana ese jiberdi.

Bul nátıjelermen komandamyz 7 týrdan keıin 10 upaı jınaqtap, úshinshi orynǵa ornalasty. Altyn medal Horvatııa quramasyna (12 upaı), al kúmis júlde Polsha komandasyna (11 upaı) buıyrdy.

Ulttyq qurama sapynda Sultan Qojahmetov, Samajan Kettebekov, Maksım Rojkov, Amangeldi Naýryzǵalıev, Meıirman Perneev pen Vıktor Maksımenko oınady.

Úshinshi orynǵa tartysta bizdiń basty qarsylastarymyz Ýkraınanyń sportshylary boldy. Sońǵy sátke deıin jeńimpaz kim bolatyny belgisiz edi. Aqyr aıaǵynda, Qazaqstan men Ýkraınanyń upaılary teń shyqsa da, koeffııent boıynsha biz alǵa shyqtyq. Bul jeńis úlken eńbektiń jemisi. Elimniń týyn joǵary kótere alǵanyma qýanyshtymyn, – dedi Sultan Qojahmetov.

Oǵan qosa, qysqy Sýrdlımpıada oıyndarynda shańǵyshy Vladıslav Grıshın 10 km qashyqtyqta 16 sportshynyń arasynda tórtinshi orynǵa ıe boldy. Juptyq sprıntte erler jáne áıelder qurama komandalary da tórtinshi orynǵa turaqtady.

Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń dırektorynyń orynbasary О́mirzaqov Ádilhan Bolathanulynyń aıtýynsha, Qazaqstan sportshylary qysqy Sýrdlımpıada oıyndaryna úshinshi ret qatysty.

Sportshylarymyz mundaı mańyzdy jarystarǵa qatysyp, tájirıbe jınaqtap, óz múmkindikterin synap kórdi. Kósh júre túzeledi demekshi sýrdo sportshylarymyzdyń alar asýlary áli alda dep senemin, – dedi ol.

Sonymen birge ol elimiz bıylǵy jarysqa úshinshi ret qatyssa da shahmat, snoýbord pen shańǵy jarysyna 25 sportshy aparyp jaman óner kórsetpegenin aıtty.

Quralaı ÁShIMHANOVA,

ASTANA