رىباكينا الەمدە ەڭ كوپ ەيس جاساعان تەننيسشى اتاندى

قازاقستاننىڭ ءبىرىنشى، الەمنىڭ ءتورتىنشى راكەتكاسى ەلەنا رىباكينا وسى ماۋسىمداعى ەيس سانى بويىنشا كوش باستادى، دەپ حابارلادى قازاقستان تەننيس فەدەراتسياسى.

تەننيسشى 26 ماتچتا 181 ەيس جاسادى.

رىباكينادان كەيىن چەحيالىق كارولينا پليشكوۆا (91 ەيس) ەكىنشى، جاپونيالىق ناومي وساكا (70) ءۇشىنشى ورىندا كەلەدى.

مايامي WTA 1000 تۋرنيرىندە رىباكينا 53 ەيس جاسادى.

ەلەنا رىباكينا WTA چەمپيوندىق كەستەسىندە بەلارۋس وكىلى ارينا سوبولەنكونى ىعىستىرىپ، ەكىنشى ورىنعا كوتەرىلدى. ال مايامي تۋرنيرىنەن كەيىن ول الەمدىك رەيتينگىدە ءوزىنىڭ ءتورتىنشى ورنىن ساقتاپ قالدى. ۇزدىك ۇشتىكتە وزگەرىس جوق. توپ-3 تىزىمىندە يگا شۆەنتەك (پولشا)، ارينا سوبولەنكو (بەلارۋس)، كوكو گاۋفف (اقش).

قازاقستاننىڭ ەكىنشى راكەتكاسى يۋليا پۋتينتسەۆا ايەلدەر تەننيسى قاۋىمداستىعى (WTA) رەيتينگىسىندە توپ-50-گە جاقىندادى.

پۋتينتسەۆا مايامي WTA 1000 ءتۋرنيرىنىڭ شيرەك فينالىنا شىعىپ، 68-دەن بىردەن 52-ورىنعا كوتەرىلدى.

يۋليا پۋتينتسەۆا وسى اپتادا چارلستون (اقش) WTA 250 جارىسىندا ونەر كورسەتەدى. ونىڭ العاشقى قارسىلاسى – اۋستراليالىق ارينا روديونوۆا. ەگەر پۋتينتسەۆا ارينا روديونوۆانى جەڭسە، ەكىنشى اينالىمدا ۋكراينالىق لەسيا تسۋرەنكومەن وينايدى.

ەرلەر اراسىندا ATP رەيتينگىسىندە الەكساندر بۋبليك 18-ساتىدا قالسا، الەكساندر شەۆچەنكو 58-دەن 56-عا كوتەرىلدى. ميحايل كۋكۋشكين – 134، دەنيس ەۆسەەۆ 182-ساتىدا، بەيبىت جۋكاەۆ 201-ورىندا، دميتري پوپكو 240-ءشى، تيموفەي سكاتوۆ 277-ساتىدا تۇر.