SportPress.kz Qazaqstan sport jańalyqtary
Túrkistan qalasynda sýrdo dzıýdodan álem chempıonaty aıaqtaldy. Jarystyń sońǵy kúninde sportshylar kata jáne komandalyq báseke boıynsha ózara myqtyny anyqtady, dep habarlady Týrızm jáne sport mınıstrligi.
Sýrdo dzıýdodan Qazaqstan erler quramasy komandalyq jarysta álem chempıony atandy. Ulttyq qurama sportshylary fınalda Ýkraına sportshylaryn 2:1 esebimen jeńdi. Al jarystyń qola júldesine Ońtústik Koreıa quramasy ıe boldy.
Áıelder arasyndaǵy komandalyq jarysta Ýkraına dzıýdoshylary qarsylas shaq keltirmedi. Ońtústik Koreıa áıelder quramasy ekinshi orynǵa, Qazaqstan áıelder quramasy úshinshi orynǵa jaıǵasty.
Álem chempıonatynda sýrdo kata sanaty boıynsha el namysyn qorǵaǵan Erkin Sultanbaev pen Igor Korman álem chempıony atandy. Ońtústik Koreıa quramasynyń sportshylary – kúmis, al Ýkraına quramasy qola júlde jeńip aldy, — dep habarlady mınıstrlik.
Sýrdo sport boıynsha Qazaqstan alǵash ret álem chempıonatyn ótkizdi. Estý qabileti tómen sportshylar arasynda ótken álem chempıonatynyń jekeleı saıysynda Qazaqstan quramasy 3 altyn, 6 kúmis jáne 4 qola júldeni jeńip aldy.
Altyn júldeni Altynbek Kakıtaev (66 kg), Shadııar Qýandyq (73 kg), Toqtarbek Aıdarbek (-100 kg) alsa, kúmis medaldi Dına Irjanova (57 kg), Ersin Bolatov (60kg), Nurmuhammed Áldibek (66 kg), Aıdos Túgelbaev (90 kg), Anna Kramorova (-78 kg) men Ekaterına Chebysheva (+78 kg) ıelendi. Al qola júldege Ferıde Qaraoǵly (52 kg), Anastasııa Tımoshenko (-70 kg), Erkebulan Qanafın (-81 kg) men Sabyrjan Hapızov (+100 kg) ıe boldy.
