الماتىنىڭ ارداگەر شاحماتشىلارى جەڭىمپاز اتاندى

جاقىندا قىزىلوردا قالاسىندا تۇڭعىش رەت ارداگەر شاحماتشىلار اراسىندا قازاقستان رەسپۋبليكاسىنىڭ كوماندالىق بىرىنشىلىگى اياقتالدى. ءار كوماندا نامىسىن قۇرامىندا ءۇش ەر جانە ءبىر ايەل شاحماتشى قورعادى.

سايىسقا ەلىمىزدىڭ 9 وبلىسىنان ون كوماندا قاتىسقان ەدى.  جارىستى وتكىزگەن قىزىلوردادان عانا ەكى كوماندا قوسىلدى. جارىس شۆەيتسار جۇيەسىمەن جۇرگىزىلىپ، جەتى كوماندالىق كەزدەسۋ وتكىزىلدى. بىرىنشىلىك ناتيجەسىندە 19،5 ۇپاي جيناعان الماتى قالاسىنىڭ شاحماتشىلارى جەڭىس تۇعىرىنا كوتەرىلىپ، باس كۋبوكتى جەڭىپ الدى.

كوماندا قۇرامىنداعى تاقتا ءنومىرى بويىنشا مارات پىرىمبەتوۆ، كيريلل كارپۋنين، مارات مۋرزين، يرينا بۋلانوۆا مەن بەكەت جاروكوۆ قورعاعان الماتىلىق شاحماتشىلار كومانداسى 5 ۇتىس، 2 تەڭ جانە ەش جەڭىلىسسىز بيىك كورسەتكىشكە يە بولدى. ەكىنشى ورىندى استانا كومانداسىنىڭ شاحماتشىلارى 18 ۇپاي ەنشىلەسە، جامبىل وبلىسىنىڭ شاحماتشىلارى 17 ۇپايمەن جۇلدەلى ۇشتىككە قول جەتكىزدى.

كەلەسى رەتتىلىكتى اقتوبە، قىزىلودا – 1، قوستاناي، پاۆلودار، شىمكەنت، قىزىلوردا – 2، باتىس قازاقستان وبلىسىنىڭ كوماندالارى يەلەندى. جۇلدەلى ۇشتىككە يە بولعان شاحماتشىلار كومانداسىنا ارنايى ديپلومدار مەن قارجىلاي سىيلىقتار تابىس ەتىلدى.

نۇرلان قۇمار،

الماتى