Qazaqstan tennısshileri WTA 1000 týrnıriniń tórtinshi aınalymyna shyqty

Elimizdiń birinshi raketkasy Elena Rybakına Ispanııanyń astanasy — Madrıd qalasynda ótip jatqan WTA 1000 týrnıriniń tórtinshi aınalymyna shyqty, dep habarlady Qazaqstan tennıs federaııasy.

Elena Rybakına úshinshi aınalymda dúnıejúzilik reıtıngide 72-orynda turǵan mysyrlyq Maıar Sherıfpen oınap, ony 6:1, 6:4 esebimen jeńdi.

Birinshi partııada Rybakına 5:0 esebimen alǵa shyqty. Sodan keıin partııany 6:1 esebimen jeńdi.

Ekinshi sette de otandasymyz 3:1 esebimen alǵa shyǵyp, sol qarqynynan tanǵan joq. Esep — 6:4.

1 saǵat 30 mınýtqa sozylǵan matchta Rybakına 1 eıspen birge 13 breık-poınttyń úsheýin paıdalandy.

Endi Rybakına shırek fınalǵa shyǵý úshin reıtıngide 136-satydaǵy chehııalyq, 18 jastaǵy Sara Beılekpen kezdesedi.

Iýlııa Pýtıneva da Madrıd WTA 1000 týrnırin sátti ótkizip jatyr.

Tennısshi úshinshi aınalymda álemniń 56-raketkasy, amerıkalyq Kerolaın Doýlhaıdtyń mysyn basty. Ol qarsylasyn 6:2, 6:2 esebimen jeńdi.

Pýtıneva bir saǵattan astam ýaqytqa sozylǵan oıynda 5 breık-poınttyń tórteýin múlt jibergen joq.

Iýlııa Pýtıneva shırek fınalǵa shyǵý úshin reseılik álemniń 11-raketkasy Darıa Kasatkınamen jolyǵady.

Aleksandr Býblık te Madrıd (Ispanııa) ATP 1000 týrnıriniń tórtinshi aınalymyna shyqty.
Ol úshinshi aınalymda álemniń 15-raketkasy, 21 jastaǵy amerıkalyq Ben Sheltonmen kezdesip, odan 6:3, 7:6 (7:2), 6:4 esebimen aılasyn asyrdy.

Býblık shırek fınalǵa shyǵý úshin álemniń 4-raketkasy, reseılik Danııl Medvedev nemese reıtıngide 26-oryndaǵy taǵy bir amerıkalyq Sebastıan Kordamen oınaıdy.