«بارعاندارى ءبىر قورا، العاندارى ءبىر قولا»: قازاقستان دزيۋدوشىلارى وليمپيادادان جۇلدە الا ما؟

استانادا دزيۋدودان وتەتىن Grand Slam الەمدىك تۋرنيرگە الىس-جاقىن 89 ەلدەن 475 سپورتشى كەلەدى. دزيۋدو وتانى — جاپونيادان ءبىر سپورتشى جارىسقا ءوتىنىم بەرگەن. سوندىقتان جارىسقا جاپونيادان ءبىر-اق دزيۋدوشى قاتىسادى.

بىلتىر ەلىمىزدە بولعان Grand Slam تۋرنيرىنە ءۇش جاپون قىزى كەلىپ، 1 التىن، 1 كۇمىس مەدال العان ەدى.

ايتايىن دەگەنىم، تۋريزم جانە سپورت ءمينيسترى جاپونيا مەن وزبەكستاننان نەگە ۇلگى المايدى؟ مىسالى، جاپونياعا وقۋ-جاتتىعۋ جيىنىنا بارعان دزيۋدوشىلار ءتورتىنشى-بەسىنشى ءنومىرلى جاپون سپورتشىلارىمەن بىرگە دايىندالادى. 1، 2، 3-ءنومىرلى جاپونمەن دايىندالىپ جاتقان الەم ەلدەرىنىڭ سپورتشىلارىن سايتتاردان، الەۋمەتتىك جەلىلەردەن ءالى كۇنگە دەيىن كورگەن جوقپىن. جاپون بيلىگى ساق جۇرەدى. جارىستارعا سپورتشىلارىن جىبەرە بەرمەيدى. بىزدەردىكىندەي ءار جارىسقا سپورتشىلارىن قاتىستىرىپ ساعىن سىندىرمايدى. ولاردىڭ عىلىمى مەن مەديتسيناسى دا دامىپ كەتكەن.

وزبەك سپورتى دا باسقالاردان كەم ەمەس. اسىرەسە، وليمپيادالىق سپورت تۇرلەرى دە دامۋ ۇستىندە. بىزگە بەلگىلى مالىمەت بويىنشا، وزبەك بيلىگى 17 سپورت تۇرىنە اقشا بولەدى. مىسالى، ءۇش جىل بۇرىن توكيو وليمپياداسىندا وزبەكتەر 3 التىن جانە 2 قولا مەدال الىپ كوماندالىق ەسەپتە 32-ورىنعا تۇراقتادى. ولار بوكس، تاەكۆوندو جانە اۋىر اتلەتيكادان جۇلدە الىپ بەردى.

وزبەكستاندا ەكى عانا جارىس ۇيىمداستىرىلادى. وزبەكستان چەمپيوناتى مەن حالىقارالىق تۋرنير وتكىزەلەدى. كەيدە ازيا مەن الەم چەمپيوناتىن دا وتكىزىپ، كوماندالىق ەسەپ بويىنشا ءبىرىنشى ورىن الاتىن بولسا عانا فەدەراتسياسى رۇقسات بەرەدى. ودان باسقا ەشقانداي جارىس وتكىزبەيدى. كوبىنە وزبەك سپورتشىلارى قازاقستان، رەسەي مەن باسقا دا شەتەلدەگى جارىستارعا بارادى. 9-10 جىل بۇرىن وزبەك بوكسشىلارى قازاقستاننان شىقپايتىن. ەندى وزبەكتى قالاي جەڭەمىز دەپ باس قاتىرىپ ءجۇرمىز. وزبەكتەر بىزدەن قالاي وزدى دەپ فەدەراتسيا زەرتتەپ، تالداۋ جاساپ جاتقان جوق. پاريجدە «كىم كىنالى؟»، دەپ وزبەكتەردەن جەڭىلىپ، بارماعىمىزدى تىستەپ وتىرمايىق،

وزبەكستان بوكس فەدەراتسياسى جاقسى جۇمىس ىستەپ جاتىر. پاريجگە جولداما العان وليمپيادا چەمپيونى حاسانباي دۋسماتوۆ پەن باحودير جالولوۆ ءالى-اق ەكى دۇركىن وليمپيادا چەمپيونى بولادى. وزبەك بوكسشىلارى مەن دزيۋدوشىلارى ءبىر-بىرىنە باسەكەلەس بولىپ وتىر. ەكى سپورت سالاسىندا باسەكە بار.

وزبەكستانعا 2019 جىلى يلياس يلياديس كەلگەلى كورشىمىزدىڭ دزيۋدوسىندا دامۋ پايدا بولدى. ازيا ويىندارى، ازيا مەن الەم چەمپيوناتى، Grand Slam، Grand Prix تۋرنيرلەرىنەن ەلىنە التىن، كۇمىس پەن قولا مەدالداردى الىپ بارادى. ال ءبىزدىڭ دزيۋدوشىلار وزبەكتەردەن قالىپ قويدى. انىق كوكەناي ۇلى ايتقانداي، «بارعاندارى ءبىر قورا، العاندارى ءبىر قولا» بولىپ شىعادى. ايتپەسە، ەلگە كەلگەن فرانتسۋز جاتتىقتىرۋشىلارى ستەفان ترەنو مەن كساۆە موندەنكس پەن فيزوتەراپيا مامانى مورگان سەللەس سياقتىلارعا قازاقستان دزيۋدو فەدەراتسياسى ميلليونداعان اقشا تولەيدى. ولاردىڭ قازاق دزيۋدوسىنا كومەگى ءتيىپ جاتقانى شامالى. ەندى فرانتسۋز ماماندارىنان قالاي قۇتىلامىز؟ پاريج وليمپياداسىنان كەيىن كەلىسىمشارتتى سوزايىق دەپ جۇرمەسىن.

كەزىندە باس باپكەر بولعان عالىمجان جىلگەلديەۆكە قىسىم كورسەتىلىپ ورنىنان الىپ تاستالدى. ەندى وعان دا زار بولىپ جۇرگەندەي مە؟ الداعى وليمپيادا فرانتسيادا وتەتىندىكتەن قازاقستان دزيۋدو فەدەراتسياسى فرانتسۋز جاتتىقتىرۋشىلارىنا اڭگىمە ايتا الماي جۇرگەن شىعار. توق ەتەرى، ميلليونداپ اقشا الاتىن فرانتسۋزدار جەڭىپ، قازاق دزيۋدوشىلارى جەڭىلدى. بارىنەن ماڭىزدىسى، پاريج-2024 وليمپياداسىنان ەلىمىزدىڭ دزيۋدوشىلارى ەكى قولا مەدال الا الا ما ەكەن؟

فرانتسيادان قازاقستانعا كەلگەن ءۇش ماماننىڭ اقشاسىن دزيۋدودان وزبەكستان قۇراماسىنىڭ باس جاتتىقتىرۋشىسى يلياس يلياديس الماۋى مۇمكىن. ءبىزدىڭ ەلگە ي.يلياديس كەلسە ءبىر-ەكى وليمپيادانىڭ كۇمىسى مەن ەكى-ءۇش قولا جۇلدەگەرىن شىعارادى. ەگەر 2018 جىلى قازاقستان دزيۋدو فەدەراتسياسى باس باپكەرلىككە يلياس ءيلياديستى شاقىرعاندا، ەلدوس سمەتوۆ توكيو وليمپياداسىندا چەمپيون بولار ەدى. بىراق وزبەكتەر بىلىكتى جاتتىقتىرۋشى يلياس ءيلياديستى وڭايلىقپەن جىبەرمەيدى جانە ءبىزدىڭ ەلدەگى ءۇش فرانتسۋز مامانىنا دا اۋىستىرمايدى.

ايبەك مۇحانوۆ،

اقتاۋ

يلياس يلياديس

دزيۋدودان قازاقستانعا فرانتسيادان كەلگەن جاتتىقتىرۋشىلار