مينيسترلىككە قىسقى سپورت تۇرلەرىنەن كوماندالار ەسەپ بەرىپ جاتىر

استانا قالاسىندا قىسقى سپورت تۇرلەرىنەن ۇلتتىق قۇراما كوماندالاردىڭ باس جاتتىقتىرۋشىلارىنىڭ 2023-2024 جىلعى قىسقى ماۋسىمدى قورىتىندىلاپ، الداعى ماۋسىمعا دايىندىقتى پىسىقتاۋعا ارنالعان ەسەپ بەرۋ كەزدەسۋلەرى بولىپ جاتىر، دەپ حابارلادى تسم سپورتتى دامىتۋ ديرەكتسياسى.

ۇلتتىق شاڭعىشىلار قاۋىمداستىعى وكىلدەرى مەن مەملەكەتتىك جاتتىقتىرۋشىلار تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسىنىڭ ورىنباسارى ازامات يماشەۆ پەن سپورتتى دامىتۋ ديرەكتسياسىنىڭ وكىلدەرىنە ەسەپ بەردى.

اتاپ ايتار بولساق، فريستايل اكروباتيكادان قازاقستان قۇراماسىنىڭ باس جاتتىقتىرۋشىسى باعلان ىڭكاربەك، شاڭعى جارىسىنان باس باپكەر الەكساندر باتيايكين، شاڭعىمەن تۇعىردان سەكىرۋدەن باس جاتتىقتىرۋشى پاۆەل ۆاسيلەۆ ماۋسىمدى قورىتىندىلادى.

ۇلتتىق قۇرامانىڭ وكىلدەرى سپورتشىلاردىڭ حالىقارالىق جارىستارداعى كورسەتكىشتەرىنە شولۋ جاساپ، رەزەرۆ دايارلاۋ جايىن قوزعادى. ماسەلەن، قىسقى سپورت تۇرلەرىنە ماماندانعان وليمپيادا دايارلاۋ ورتالىقتارىنىڭ بىرىندە سنوۋبورد سەكتسياسىن اشۋ جونىندە ۇسىنىس ايتىلدى.

مامانداردىڭ ايتۋىنشا، بۇل ديستسيپلينا جاستار اراسىندا كەڭىنەن تانىلعان. ەلىمىزدە كاسىبي تۇردە شۇعىلدانۋشىلار قاتارى كوپ ەمەس. سوعان قاراماستان اق وليمپيادادا ەڭ كوپ جۇلدە جيىنتىعى ساراپقا سالىناتىن باعدارلامانى نازاردان تىس قالدىرماي، قولعا الۋ كەرەك.

ەسەپ بەرۋ كەزىندە پاۆەل ۆاسيلەۆ وڭتۇستىك كورەيادا وتكەن IV قىسقى جاسوسپىرىمدەر وليمپياداسىندا ەلىمىزگە العاشقى التىن مەدالدى سىيلاعان يليا ميزەرنىحتىڭ جەتىستىگى سايكەستىك ەمەس، بىرىگىپ ىستەگەن جۇمىستىڭ جەمىسى ەكەنىنە ەرەكشە توقتالدى.

بيىل ەگەمەندىك العان جىلدار ىشىندە شاڭعىمەن تۇعىردان سەكىرۋشىلەر ءۇشىن ەڭ تابىستى ماۋسىم بولدى. وسى ماۋسىمدا شاڭعىمەن تۇعىردان سەكىرۋشىلەر ماۋسىمدى جوسپارعا ساي ۋاقىتىندا باستاپ، سپورتتى دامىتۋ ديرەكتسياسى مەن ۇلتتىق سپورتتىق مەديتسينا جانە وڭالتۋ ورتالىعىنان دەر كەزىندە قولداۋ العان. مۇنىڭ تاعى ءبىر كورسەتكىشى — يليانىڭ كانۆوندوداعى ويىنداردان كەيىن جاسوسپىرىمدەر اراسىنداعى الەم چەمپيوناتىنداعى جاقسى ناتيجەسى.

سوعان قاراماستان ءالى دە كەي كوماندالار دارىگەر، ماسساجيست، سپورت پسيحولوگى سىندى ماماندارمەن تۇراقتى قامتاماسىز ەتىلمەي كەلەدى.

كەزدەسۋدە ازامات يماشەۆ قىتايدىڭ حاربين قالاسىندا وتەتىن قىسقى ازيا ويىندارى قارساڭىندا مۇنداي پروبلەمانىڭ بولماۋى كەرەكتىگىن ەسكەرتتى.