Qamshybek Qońqabaev: «Olımpıadada qatelespeýge tyrysamyn»

Astanada bokstan 13-18 mamyr aralyǵynda ótetin «Elorda kýbogy» týrnırine ulttyq qurama komandanyń asa aýyr salmaqtaǵy boksshysy, Olımpıada jáne álem chempıonatynyń júldegeri Qamshybek Qońqabaev ta qatysady.

Qazir ol ulttyq quramanyń basqa da boksshylarymen birge týrnırge daıyndalyp jatyr. Qońqabaev Olımpıadaǵa joldamany bárinen buryn alyp qoıǵan. Ol byltyr Qytaıdyń Hanchjoý qalasynda ótken HIH jazǵy Azııa oıyndarynyń fınalynda ózbekstandyq Bahodır Jalolovtan jeńilse de Olıpıadaǵa lıenzııany alǵan bolatyn.

Sodan keıin ol bıylǵy naýryzda Ázerbaıjan Respýblıkasynyń astanasy – Bakýde bolǵan «Uly jibek joly» halyqaralyq týrnırine qatysty. Osy týrnırde boksshy reseılik Ramazan Karnýkaevqa birinshi aınalymda ese jiberdi. Endi mine, Qońqabaev Olımpıada aldynda taǵy bir týrnırge qatysýǵa bel baılap otyr. Onyń aıtýynsha, ol birazdan beri Olımpıadaǵa daıyndalyp keledi. Bıylǵy «Elorda kýbogy» týrnırine osal boksshy qatyspaıdy. Sondyqtan jarysqa jaqsy daıyndalyp, Olımpıadada el namysyn laıyqty qorǵaý úshin bara jatqanyńdy kórsetý kerek.

«Elorda kýbogy» týrnıriniń jaýapkershiligi zor. Astanadaǵy týrnırge 7-8 memleketten sportshylar keledi. Báriniń de qarqyny jaqsy. Qazirgi josparymyz — osy jarystaǵy áleýetimizdi baıqap, keıin Olımpıadada qate jibermeýge tyrysý.

Jaqynda Bakýde ótken halyqaralyq jarysta reseılik boksshydan jeńilip qaldym. О́zimnen qate ketti. Endi sol olqylyqtarmen jumys istep jatyrmyn.  Tamaqtaný, rejım, daıyndyq — bári oıdaǵydaı. «Elorda kýbogynana» keıingi josparymyzdy bapkerler jasaıdy, — dedi Qońqabaev.

Ol Olımpıadada qatelespeýge tyrysatynyn, búkil el aldynda ózine júktelgen mindet pen jaýapkershilikti jaqsy sezinip júrgenin, el namysyn abyroımen qorǵaýǵa qolda bar kúsh-jigerdiń bárin salatynyn aıtty.

Dastan KENJALIN,

ASTANA