SportPress.kz قازاقستان سپورت جاڭالىقتارى
16-27 مامىر ارالىعىندا وزبەكستانىڭ استاناسى — تاشكەنتتە سپورتتىق گيمناستيكادان ازيا چەمپيوناتىنىڭ جالاۋى كوتەرىلەدى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.
وعان قازاقستان اتىنان ناريمان كۋربانوۆ، ميلاد كاريمي، دميتري پاتانين، ءىلياس ازيزوۆ، دياس تويشىبەك پەن فارۋح نابيەۆ قاتىسادى.
قازىر قازاقستان قۇراماسى ساپىنان ناريمان كۋربانوۆ پەن ميلاد كاريمي پاريج وليمپياداسىنىڭ جولداماسىن الىپ وتىر. ال قالعان گيمناسشىلارىمىز قۇرلىققا بەرىلگەن جالعىز ليتسەنزياعا تالاسادى.
بىرىنشىدەن، ءبىز وتە جاقسى دايىندالدىق. سپورتتى دامىتۋ ديرەكتسياسى، فەدەراتسيا بار جاعدايدا جاسادى. ماقسات — تاعى ليتسەنزيانى جەڭىپ الۋ. بىزبەن قاتار قىتاي، جاپونيا، وڭتۇستىك كورەيانىڭ جولداما العان سپورتشىلارى تەك جۇلدەگە تالاسادى. ال قالعان كوماندالاردىڭ كوزدەگەنى ليتسەنزيا عانا.
وسى جولى دا كوماندالىق سايىستا وليمپيادا ليتسەنزياسىنا تالاسامىز. سونىمەن قاتار جەكەلەگەن سناريادتاردا كوزگە تۇسسەك دەيمىز. اتاپ ايتار بولسام، دميتري پاتانين ەركىن جاتتىعۋدا، ءىلياس ازيزوۆ كوپسايىستا جوعارى ناتيجە كورسەتىپ، جولداما الۋعا بارىن سالادى. بۇگىنگى دايىندىقتاعى كورسەتكىشتەرى جاقسى. كەتكەن قاتەلىكتەردى تۇزەسەك، شامامىز كەلەدى، — دەدى ۇلتتىق قۇرامانىڭ باس جاتتىقتىرۋشىسى الەكساندر كيم سپورتتى دامىتۋ ديرەكتسياسىنا بەرگەن سۇحباتىندا.
سۇحباتتا باس جاتتىقتىرۋشى تاشكەنتتەگى چەمپيوناتقا بارا جاتقان ەلىمىزدىڭ جاستار قۇراماسى تۋرالى ايتتى. ونىڭ ايتۋىنشا، قازىر بىرنەشە دارىندى گيمناسىمىز تۇراقتى ناتيجە كورسەتىپ كەلەدى.
بىزدە قازىر مىقتى گيمناسشىلار قالىپتاسىپ كەلە جاتىر. جاستار قۇراماسىنىڭ اعا باپكەرى ۆيكتور ءپاروشيننىڭ جۇمىسىن ەرەكشە اتاپ وتكىم كەلەدى. نۇرتاڭ ىدىرىسوۆ، رومان حيگاي، ارتيوم كوۆالەۆ، التىنحان تەمىربەك، ۆلاديسلاۆ بابۋشكين بىزبەن بىرگە ازيا چەمپيوناتىندا ونەر كورسەتەدى.
وسى سپورتشىلاردىڭ ءبارى بىلتىر جاستار اراسىنداعى الەم چەمپيوناتىندا جاقسى ونەر كورسەتكەن. بىلتىرعى ازيا چەمپيوناتىندا نۇرتاڭ مەن التىنحان جۇلدەگەر قاتارىنان كورىنگەنى بار. وسى جولى سول اتاعىن قورعاي الاتىنىنا سەنەمىن، — دەدى الەكساندر كيم.
