ەلىمىزگە «بولاشاقتىڭ ويىندارى» ءتۋرنيرىنىڭ كوميسسيالارى كەلدى

تۋريزم جانە سپورت ءمينيسترى ەرمەك مارجىقپاەۆ 2026 جىلى قازاقستاندا وتەتىن «بولاشاقتىڭ ويىندارىن» الدىن الا باعالاۋ ءۇشىن ارنايى كەلگەن Phygital International حالىقارالىق كومپانياسىنىڭ وكىلدەرىمەن كەزدەستى، دەپ حابارلادى تۋريزم جانە سپورت مينيسترلىگى.

Phygital International حالىقارالىق كومپانياسى «بولاشاقتىڭ ويىندارى» ءتۋرنيرىنىڭ قۇقىعىن يەلەنگەن. Phygital International باعالاۋشىلارى استانا قالاسىندا 15-18 مامىر ارالىعىندا تەكسەرىس جۇرگىزەدى.

قازىر كيبەرسپورت فەدەراتسياسىمەن بىرىگىپ، 2026 جىلى استانا قالاسىندا وتكىزۋدى جوسپارلاپ وتىرعان «بولاشاقتىڭ ويىندارىنا» دايىندىق جۇمىستارىن باستادىق. مينيسترلىك تاراپىنان قازاقستاندا وسى سايىستى لايىقتى دەڭگەيدە وتكىزۋ ءۇشىن بارلىق قاجەتتى شارالار قابىلدانادى، — دەدى ەرمەك مارجىقپاەۆ.

Phygital International وكىلدەرى EXPO حالىقارالىق كورمە ورتالىعى، جاقسىلىق ۇشكەمپىروۆ اتىنداعى جەكپە-جەك سارايى، «بارىس ارەنا» سپورت كەشەنى، Qazaqstan جەڭىل اتلەتيكا سپورت كەشەنى، «الاۋ» مۇز ايدىنى سارايى، «سارىارقا» ۆەلوترەگى، «استانا ارەنا» ستاديونى جانە باسقا دا قالانىڭ سپورت نىساندارىن ارالاپ، باعالايدى.

بيىلعى جىلدىڭ 1 قازانىندا 2026 جىلعى ويىنداردى وتكىزۋ مۇمكىندىگىن جەڭىپ العان قالا انىقتالادى.

ەسكە سالا كەتسەك، 21 اقپانىندا مەملەكەت باسشىسى قاسىم-جومارت توقاەۆ تاتارستاننىڭ قازان قالاسىندا «بولاشاقتىڭ ويىندارىنىڭ» اشىلۋ سالتاناتىنا قاتىسىپ، قازاقستاندا وتكىزۋ تۋرالى ويىن بىلدىرگەن ەدى. قازاقستان پرەزيدەنتىنىڭ تاپسىرماسىنا سايكەس، جارىس 2026 جىلى ەلىمىزدە ۇيىمداستىرۋ جوسپارلانعان.