وليمپيادانىڭ كۇمىس مەدالىن الاتىنىما سەنبەدىم – اننا نۇرمۇحامبەتوۆا

2012 جىلى اۋىر اتلەتيكادان ۇلىبريتانيانىڭ استاناسى – لوندون قالاسىندا وتكەن جازعى وليمپيالىق وينىنداردا بەسىنشى ورىن العان وتاداسىمىز اننا نۇرمۇحامبەتوۆا اراعا 12 جىل سالىپ، وليمپيادانىڭ كۇمىس جۇلدەسىنە يە بولدى.

وعان وليمپيادانىڭ كۇمىس مەدالى پەرۋدىڭ استاناسى — ليمادا سپورتتىڭ وسى تۇرىنەن ءوتىپ جاتقان جاسوسپىرىمدەر اراسىنداعى الەم چەمپيوناتىندا سالتاناتتى تۇردە تابىس ەتىلدى.

ەسكە سالا كەتسەك، 2012 جىلعى وليمپيادادا اننا نۇرمۇحامبەتوۆا 69 كەلىگە دەيىنگى سالماقتا جالپى ەسەپتە بەسىنشى ورىن العان بولاتىن. سول كەزدە حالىقارالىق وليمپيادا كوميتەتى چەمپيون اتانىپ، جۇلدە العان سپورتشىلاردىڭ تىيىم سالىنعان زاتتاردى قولدانعانىنا كۇمان كەلتىرىپ، مەداليستەردى تەكسەرگەندە مارينا شكەرمانكوۆا (بەلارۋس) مەن دينا سازانوۆەتستىڭ (بەلارۋس) دوپينگتى پايدالانعانى انىقتالدى. ءسويتىپ، ولار سپورتتان شەتتەتىلىپ، ارادا ءبىراز ۋاقىت وتكەندە جۇلدەلەر قايتا ۇلەستىرىلدى. بەلارۋس سپورتشىلارىنىڭ ناتيجەسى قايتا قارالىپ، جويىلعان سوڭ، نۋرمۋحامبەتوۆا قولا مەدال الدى.

سودان كەيىن 2020 جىلى كۇمىس مەدال العان رۋمىن اتلەتى روكسانا كوكوشتىڭ سىناماسى قايتا تەكسەرىلىپ، ودان دا دوپينگ انىقتالدى. كەيىن ونىڭ دا ناتيجەسى جويىلىپ، كۇمىس جۇلدەسىن قايتارىپ بەردى.

قايتا مەدال ۇلەستىرۋ كەزىندە اننا نۇرمۇحامبەتوۆا ەكىنشى ورىنعا كوتەرىلىپ، ونىڭ قولا مەدالى كولۋمبيالىق ۋبالدينا ۆالەسكە بەرىلدى.

ەندى قازىرگى ەسەپ بويىنشا قازاقستان لوندون وليمپياداسىنان 3 التىن، 2 كۇمىس، 6 قولا جۇلدە الىپ وتىر.

اننا نۇرمۇحامبەتوۆا – 1993 جىلى قوستاناي وبلىسىندا. ول بالالار ۇيىندە تاربيەلەنگەن. بالا ۇيىنەن كەيىن كوكشەتاۋ قالاسىنا كوشىپ بارعان. سول جەردەگى قالالىق سپورت مەكتەبىندە جاتتىققان.

مۇنداي شەشىمدى دوپينگ-سىنامالاردى قايتا تەكسەرىپ، مەدالدەردى قايتا تاعايىنداعاننان كەيىن حالىقارالىق وليمپيادا كوميتەتىنىڭ تارتىپتىك كوميسسياسى مەن CAS سپورتتىق اربيتراج سوتى قابىلدادى.

مەن شىنىمدى ايتايىن، وسى قۋانىشتى ەستىگەندە وتە تولقدىم.  بۇعان سەنۋ قيىن بولدى. دەگەنمەن، 12 جىل ءوتتى. سوعان قاراماستان، مەن بۇل وقيعاعا، وسى مەدالعا شەكسىز قۋانىشتىمىن، — دەدى اننا نۇرمۇحامبەتوۆا.

ول ءوزىنىڭ سپورتتىق مانسابىن اياقتاپ، قازىر «بۋراباي» بجسم-دە سپورت ادىسكەرى بولىپ جۇمىس ىستەيدى.

داستان كەنجالين،

استانا