قازاقستان بوكسشىلارى ءتۋرنيردى جەڭىسپەن باستادى (ۆيدەو)

تايلاندتىڭ استاناسى – بانگكوك قالاسىندا بوكستان پاريج وليمپياداسىنىڭ جولداماسى بەرىلەتىن سوڭعى تۋرنير باستالدى.

50 كگ دەيىنگى سالماقتاعى نازىم قىزايباي، 63،5 كەلىدەگى مۇحاممەدسابىر بازارباي ۇلى مەن 60 كەلى سالماقتاعى ريمما ۆولوسەنكو ەرلەر جانە ايەلدەر قۇرامالارىنان العاشقى بولىپ جەكپە-جەككە شىعىپ، قارسىلاستارىن جەڭدى.

نازىم قىزايباي سلوۆاكيا وكىلى نيكول دۋريكوۆادان ايلاسىن اسىردى.

بۇل – قىزايبايدىڭ پاريج وليمپياداسىنىڭ جولداماسىنا تالاسىپ جاتقان ەكىنشى جارىسى. بۇعان دەيىن ول 2023 جىلى قىتايدىۋڭ حانچجوۋ قالاسىندا وتكەن جازعى ازيا ويىندارىندا ءبىر عانا قادام قالعان كەزدە سۇرىنگەن ەدى.

وسىدان كەيىن شارشى الاعا كوتەرىلگەن مۇحاممەدسابىر بازارباي ۇلى جاستار اراسىنداعى الەم چەمپيوناتىنىڭ قولا جۇلدەگەرى كريستيان لاۋرەنتەنى (فيليپپين) 5:0 ەسەبىمەن تىزە بۇكتىردى.

جەكپە-جەكتە فيليپپين وكىلىنەن ەرەجەنى قايتا-قايتا بۇزعانى ءۇشىن ەكى رەت ۇپايى الىنىپ تاستالدى. بۇل — وتانداسىمىزدىڭ پاريج وليمپياداسىنىڭ جولداماسىنا تالاسىپ جاتقان ەكىنشى جارىسى. بۇعان دەيىن ول بىرنەشە اي بۇرىن يتاليانىڭ بۋستو-ارسيتسيو قالاسىنداعى الەمدىك ىرىكتەۋ كەزەڭىنىڭ ەكىنشى كەزەڭىنە دەيىن جەتكەن بولاتىن.

ۇلتتىق قۇرامانىڭ تاعى ءبىر سپورتشىسى ريمما ۆولوسەنكو گەرمانيا سپورتشىسى ماريا گانگباۋەردان ايلاسىن اسىردى. ونىڭ قارسىلاسى ءۇشىنشى راۋندتا ەرەجە بۇزىپ، ءبىر ۇپايى جوعالتىپ الدى.

ۆولوسەنكو وسىمەن پاريج وليمپياداسىنىڭ جولداماسىنا ءۇشىنشى رەت باق سىناپ جاتىر.

داستان كەنجالين،

استانا