فۋتبول: الماتىدا 15 جاسقا دەيىنگى جاسوسپىرىمدەر قۇراماعا ىرىكتەلىپ جاتىر

قازاقستان فۋتبول فەدەراتسياسىنىڭ FIFA High Performance دەپارتامەنتىمەن ىنتىماقتاستىعى اياسىندا شاقىرىلعان اعىلشىن مامانى ستيۋارت دجون حوللدىڭ جەتەكشىلىگىمەن الماتىدا 15 جاسقا دەيىنگى جاسوسپىرىمدەر قۇراماسىنا ىرىكتەۋ بولىپ جاتىر، دەپ حابارلادى قازاقستان فۋتبول فەدەراتسياسى.

ەسكە سالا كەتسەك، سوڭعى جارتى جىلدا ستيۋارت دجون حولل ەلىمىز بويىنشا فۋتبولمەن اينالىساتىن 15 جاسقا دەيىنگى جاسوسپىرىمدەردى قفف تەحنيكالىق ورتالىعى، ۇلتتىق قۇرامالاردىڭ جاتتىقتىرۋشىلار شتابى مەن ايماقتىق قفف باپكەرلەرىنىڭ قولداۋىمەن ىرىكتەدى.

سكاۋتينگ ناتيجەسى بويىنشا بولاشاق U-15 قۇراماسى ءۇشىن 43 ويىنشىنىڭ پورتفوليوسى قۇرىلدى.

باعدارلاما ءۇش جىلعا سوزىلادى. ىرىكتەۋدە ءوزىن كورسەتە بىلگەن 2010 جىلعى 25 تالانتتى فۋتبولشى تالعار قالاسىندا وقۋ-جاتتىعۋ جۇمىستارىن وتكىزۋ ءۇشىن ۇلتتىق اكادەمياعا قوسىلادى. جاس ويىنشىلار باپكەرلىك شتابتىڭ جەتەكشىلىگىمەن جاتتىعىپ، فيفا مەن ۋەفا-نىڭ تۋرنيرلەرىندە تۇڭعىش قازاقستان U-15 قۇراماسىنىڭ نامىسىن قورعايدى.