Fýtbol: Almatyda 15 jasqa deıingi jasóspirimder quramaǵa iriktelip jatyr

Qazaqstan fýtbol federaııasynyń FIFA High Performance departamentimen yntymaqtastyǵy aıasynda shaqyrylǵan aǵylshyn mamany Stıýart Djon Holldyń jetekshiligimen Almatyda 15 jasqa deıingi jasóspirimder quramasyna irikteý bolyp jatyr, dep habarlady Qazaqstan fýtbol federaııasy.

Eske sala ketsek, sońǵy jarty jylda Stıýart Djon Holl elimiz boıynsha fýtbolmen aınalysatyn 15 jasqa deıingi jasóspirimderdi QFF Tehnıkalyq ortalyǵy, Ulttyq quramalardyń jattyqtyrýshylar shtaby men aımaqtyq QFF bapkerleriniń qoldaýymen iriktedi.

Skaýtıng nátıjesi boıynsha bolashaq U-15 quramasy úshin 43 oıynshynyń portfolıosy quryldy.

Baǵdarlama úsh jylǵa sozylady. Irikteýde ózin kórsete bilgen 2010 jylǵy 25 talantty fýtbolshy Talǵar qalasynda oqý-jattyǵý jumystaryn ótkizý úshin ulttyq akademııaǵa qosylady. Jas oıynshylar bapkerlik shtabtyń jetekshiligimen jattyǵyp, FIFA men ÝEFA-nyń týrnırlerinde tuńǵysh Qazaqstan U-15 quramasynyń namysyn qorǵaıdy.