شاحماتشى قازىبەك نوگەربەك: «تامىز ايىندا ماگنۋس كارلسەندى جەڭەمىن»

دەنە شىنىقتىرۋ جانە بۇقارالىق سپورت اكادەمياسىنىڭ ۇجىمى مەن ستۋدەنتتەرى وسى ءبىلىم ورداسىنىڭ ستۋدەنتى، 20 جاسقا دەيىنگى شاحماتتان الەم چەمپيونى قازىبەك نوگەربەكپەن كەزدەستى، دەپ حابارلادى وقۋ ورنىنىڭ ءباسپاسوز قىزمەتى.

قازىبەك نوگەربەك – اكادەميانىڭ ستۋدەنتى عانا ەمەس، ونىڭ ماقتانىشى. كەزدەسۋ سۇراق-جاۋاپ پىشىنىندە بولدى. وسى باسقوسۋدا جاستار اراسىنداعى الەم چەمپيونى باتىل مالىمدەمە جاساپ، الداعى ۋاقىتتا نورۆەگيانىڭ شاحماتشىسى، الەمنىڭ 16-الەم چەمپيون (2013—2023)، شاحماتتىڭ كلاسسيكالىق، راپيد جانە بليتس تۇرلەرىنەن الەم چەمپيونى ماگنۋس كارلسەندى جەڭەتىنىن ايتتى. ەگەر ونىڭ ويى ىسكە اسسا،  قازىبەك نوگەربەكتىڭ جەڭىسى بۇكىل ەلىمىزگە ۇلكەن ابىروي اكەلىپ، مەرەيىمىزدى وسىرەتىنى ءسوزسىز، — دەلىنگەن حابارلامادا.

قازىبەك نوگەربەك جاقىندا ءۇندىستاننىڭ گانديناگار قالاسىندا وتكەن 20 جاسقا دەيىنگى شاحماتشىلار اراسىنداعى الەم چەمپيوناتىندا التىن جۇلدەنى جەڭىپ الدى.

ول كلاسسيكالىق شاحماتتان 11 تۋردان كەيىن 8،5 ۇپاي جينادى. قازىر قازىبەك نوگەربەكتىڭ FIDE-دەگى رەيتينگى – 2501.

نوگەربەك يننوۆاتسيالىق ءبىلىم بەرۋ باعدارلاماسىندا شاحماتتان پەداگوگ-جاتتىقتىرۋشى ماماندىعى بويىنشا وقيدى. بۇل جەڭىس شاحماتشىعا التىن مەدال عانا ەمەس، الەم كۋبوگىنا جولداما دا الىپ بەردى.

وسىعان بايلانىستى مەملەكەت باسشىسى قاسىم-جومارت توقاەۆ شاحماتشىعا قۇتتىقتاۋ حاتىن جولدادى.

ەل نامىسىن قورعاپ، ۇزدىك شاحماتشى رەتىندە گروسسمەيستەر دارەجەسىن يەلەنىپ، الەم چەمپيونى اتانۋ – زور جەتىستىك. ۇلتىمىزدىڭ ابىرويىن اسقاقتاتاتىن ءوزىڭ سياقتى العىر دا اقىلدى ۇرپاقتىڭ ءوسىپ كەلە جاتقانى قۋانتادى. الداعى ۋاقىتتا دا جارقىن جەڭىستەرگە جانە ارمان-ماقساتتارىڭا جەتە بەرۋىڭە تىلەكتەسپىن، – دەلىنگەن جەدەلحاتتا.

قازىبەك نوگەربەك وسىدان ەكى جىل بۇرىن گرەكيادا وتكەن 18 جاسقا دەيىنگى ويىنشىلار اراسىنداعى الەم چەمپيوناتىندا راپيد پەن بليتستە چەمپيون اتانعان بولاتىن.