ۇلتتىق وليمپيادا كوميتەتى street workout الاڭقايلارىن اشىپ جاتىر

وسكەمەن قالاسىندا street workout الاڭقايى اشىلدى.

Street workout –كوشە مادەنيەتىن دامىتۋداعى ەڭ تانىمال باعىتتاردىڭ ءبىرى. بۇگىندە ول ەلىمىزدە ۇوك جوباسىنىڭ ارقاسىندا حالىق ەڭ كوپ قاتىساتىن سپورت تۇرىنە اينالدى. ۇوك پرەزيدەنتى تيمۋر ق ۇلىباەۆتىڭ باستاماسىمەن 2016 جىلدان بەرى ەلىمىزدىڭ ءار ايماعىندا 50-دەن اسا مامانداندىرىلعان سپورتتىق الاڭقايلار اشىلدى. بۇل الاڭعايلاردىڭ كوبىسىن تيمۋر اسقار ۇلى ءوز قالتاسىنان اقشا شىعارىپ سالدى. قازىر استانا، الماتى، شىمكەنت، قىزىلوردا، تاراز، قاراعاندى، اقتاۋ، اقتوبە، جاڭاوزەن جانە كوكشەتاۋ قالالارىندا الاڭقايلار سالىنعان. جوبانىڭ ەڭ باستى ارتىقشىلىعى – الاڭقايلاردىڭ تەك وبلىس ورتالىقتارىندا عانا ەمەس، وبلىستان شالعاي جاتقان قالالاردا دا اشىلۋىندا.

–ۇوك وليمپيادالىق سپورت تۇرلەرىن دامىتۋعا جاۋاپتى. الايدا، كاسىپقوي سپورتتاعى جەتىستىكتەر بۇقارالىق سپورتتان باستالاتىنىن ەستەن شىعارماۋ قاجەت. مۇنداي سپورتتىق الاڭقايلاردىڭ اشىلۋى بالالار مەن جاستاردىڭ دەنە شىنىقتىرۋ مەن سپورتقا دەن قويۋىنا سەبەپ بولادى. اشىق اسپان استىنداعى سپورتتىق زونالار ەل تۇرعىندارى ءۇشىن ءتيىمدى ەكەنىن دالەلدەپ جاتىر. ءبىز الاڭقايلاردىڭ ۇلكەن سۇرانىسقا يە ەكەنىن، قاڭىراپ بوس قالمايتىنىن بايقادىق. ول جەردە ۇنەمى ءارتۇرلى دەڭگەيدەگى سپورتتىق جارىستار ءوتىپ تۇرادى. قازىرگى تاڭدا ۇوك وكىلدەرى ەل ايماقتارىن ارالاۋدا. وسى ورايدا، ءبىز اتالعان الەۋمەتتىك جوبا تۋرالى باستى جاڭالىقتاردى ءبىلىپ وتىرمىز. بۇل جوبانى ءارى قاراي جالعاستىرا بەرەمىز. الداعى ۋاقىتتا شالعايدا جاتقان اۋىلداردا دا الاڭقايلار بوي تۇزەيدى، — دەدى ۇوك باس حاتشىسى دانيار ابۋلگازين.

وسكەمەندەگى ساياباق ايماقتارىندا قۇرىلعان ءتورت الاڭقايدىڭ اشىلۋ سالتاناتىنا وبلىس باسشىلىعى، ۇوك مەن  STREET WORKOUT فەدەراتسياسىنىڭ وكىلدەرى قاتىستى. سەمەيدە مامانداندىرىلعان الاڭقايلاردى اشۋ تۋرالى جوسپار جاقىن ارادا ىسكە اسادى. سەمەيدەگى حالىق كوپ قونىستانعان اۋماقتا ءتورت الاڭقاي ورنالاسقان.

Street workout مامانداندىرىلعان الاڭقايلارى ەڭ پايدالى قۇرىلعىلارمەن جابدىقتالعان. الاڭقايداعى قۇرىلعىلار جابدىعى بۇلشىق ەتتەردىڭ بارلىق توپتارىن جۇمىلدىرىپ، جاتتىعۋدىڭ تيىمدىلىگىن ارتتىرادى. بۇل الاڭقايلاردىڭ باستى ەرەكشەلىگى ونىڭ ۇلكەن اۋىرتپالىقتى كوتەرە الاتىن مىقتى بەكىتۋلەر بار. ال رەزينادان جاسالعان جابدىقتار جاتتىعۋ كەزىندە جاراقات الۋ قاۋپىن سەيىلتەدى.

Street workout فەدەراتسياسىنىڭ ايتۋىنشا، بۇگىندە 80 مىڭعا جۋىق قازاقستاندىقتار سپورتتىڭ وسى تۇرىمەن شۇعىلدانادى.

ۇلتتىق وليمپيادا كوميتەتىنىڭ ءباسپاسوز قىزمەتى