ەراسىل قاجىباەۆ – باكۋدەگى ۇلكەن دۋلىعا ءتۋرنيرىنىڭ قولا جۇلدەگەرى

دزيۋدودان ۇلتتىق قۇرامانىڭ سپورتشىسى ەراسىل قاجىباەۆ ءازەربايجاننىڭ استاناسى — باكۋدە ءوتىپ جاتقان ۇلكەن دۋلىعا ساناتىنداعى جارىستا ۇزدىك ۇشتىككە كىردى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

اسا اۋىر سالماقتاعى (+100 كگ) وتانداسىمىز جۇلدە جولىندا گرۋزيالىق سابا ينانيەشۆيليدى قوسىمشا ۋاقىتتا (golden score) جەڭدى.

ايتا كەتەيىك، ەراسىل قاجىباەۆ ءۇشىن باكۋ ولجالى قالانىڭ ءبىرى. ول وسىدان 2 جىل بۇرىن ۇلكەن دۋلىعا تۋرنيرىندە دە قولا جۇلدەگەر اتانعان ەدى.

بۇگىن مارەسىنە جەتكەن جارىستا 36 ەلدىڭ 258 تاتامي شەبەرى سىنعا ءتۇستى.