جەلتوقسان باتىرلارى جاسىل الاڭدا دوپ تەپتى

بۇگىن الماتى وبلىسى بورالداي ەلدى مەكەنىندەگى «داۋلەت» سپورت كەشەنىندە ۇلى وتان سوعىسىنداعى جەڭىستىڭ 80 جىلدىعىنا ارنالعان « ۇلى جەڭىس-ماڭگىلىك تاعزىم» اتتى شاعىن فۋتبولدان ارداگەرلەر اراسىندا ىلە اۋدانىنىڭ دوپ دوداسى ءوتتى.

بۇل تۋرنيرگە «جەلتوقسان اقيقاتى» رەسپۋبويكالىق قوعامدىق بىرلەستىگىنىڭ باتىرلارىن ارنايى قۇرمەتپەن شاقىرعان بولاتىن. تۋرنيرگە قاتىسقان 10 كوماندانىڭ ىشىنەن جاستارى الپىستان اسقان جەلتوقسان ارداگەرلەرى دە تارتىستى ويىن كورسەتىپ، بالالارىمەن جاستى جاستارعا قارسى اجەپتەۋىر شەبەرلىكتەرىن پاش ەتتى. وسىلايشا «سىرلى اياقتىڭ سىرى كەتسە دە سىنى كەتپەيدى»، دەمەكشى جەلتوقساندىقتار جۇلدەگە جەتپەسە دە مارتەبەلى ءتورتىنشى ورىنعا يە بولدى.

اۋىل جاستارى كوز تىگىپ تاماشالاعان ايتۋلى تۋرنيرگە ارنايى كەلىپ قانا قويماي وزگەشە ويىن ورنەگىمەن جاس ۇرپاققا ۇلكەن ۇلگى-ونەگە بولعان جەلتوقساننىڭ باتىرلارىنا اۋىل حالقى ەرەكشە قۇرمەت كورسەتىپ، ريزا بولدى. جارىس سوڭىندا ۇزدىك ويىنشىلار مەن جەڭىس تۇعىرىنا شىققان كوماندالار ۇيىمداستىرۋشى بورالداي اۋىلى ارداگەرلەر كەڭەسىنىڭ توراعاسى نۇرلان شورمانوۆ مەن جەلتوقسان باتىرى رايا جۇمانشيەۆا ازىرلەگەن ماراپاتتار مەن اقشالاي سىيلىقتارعا يە بولدى.

جاقسى كوڭىل-كۇيدە وتكەن الامان دوپ دوداسى اياقتالعان سوڭ قاتىسۋشىلار ۇيىمداستىرۋشىلار القاسىنا زور العىستارىن ايتىپ، ەستەلىككە سۋرەتكە ءتۇسىپ ۇيلەرىنە تارقاستى. ايتپاقشى، ماراپاتتاۋ ساتىندە اياقاستى بولعان قۋانىشتى كورىنىستى ايتپاي كەتپەسە بولماس. جالىندى جاس جەڭىمپاز كوماندالاردىڭ ويىنشىلارى مويىندارىنداعى التىن، كۇمىس القالارىن شەشىپ الىپ بارىپ، اعا بۋىن جەلتوقسان ارداگەرلەرىنە قۇرمەتپەن تابىس ەتتى. بۇل دا ءبىر ۇلكەنگە قۇرمەت جاساۋدى بىلەتىن ناعىز قازاقى ادەپتىلىكتىڭ بەلگىسى دەپ قابىلدادىق.

PS.

تەك وكىنىشتى ءبىر نارسەنى ايتپاساق بولماس. جارىستىڭ اشىلۋ سالتاناتىندا ءبىر توپ فۋتبولدان ءجاسوسپىرىم قازاقتىڭ بالالارى كەلىپ قاتىستى. ءسوز رەتىندە ولاردان قازاقتىڭ ايگىلى ءۇش فۋتبول شەبەرى تيمۋر سەگىزباەۆ، قۇرالبەك ورداباەۆ پەن سەيىلدا بايشاقوۆتاردىڭ ەسىمدەرىن جانە ولار كىمدەر ەكەنىن سۇراعانىمىزدى، باستارىن تومەن سالبىراتىپ جاۋاپ بەرە المادى. ال، مەسسي مەن رونالدونى جاقسى بىلەتىندەرىن ماقتانا ايتتى. جاسوسپىرىمدەردىڭ ءوزىمىزدىڭ وتاندىق فۋتبولدىڭ نەگىزىن قالاعان داڭقتى جانداردىڭ ەسىمدەرىن بىلمەي تۇرىپ، شەتەلدىڭ ويىنشىلارىن سايراپ ايتىپ بەرگەنى كوڭىلىمىزگە قاياۋ ءتۇسىردى. ءيا، بۇل جەردە فۋتبول ۇيىرمەسىنىڭ جاتتىقتىرۋشىلارىنىڭ ۇلكەن قاتەلىكتەرى دەپ ايتار ەدىك. ادام ءوزىنىڭ تۋعان ەلىندە ءجۇرىپ اتاقتى تۇلعالارىن بىلمەۋ ساۋاتسىزدىقپەن بىرگە ۇلتىنىڭ ماقتانىشتارىنان بەيحابار بولۋى قاسىرەت شىعار. ۇستازدار الدىمەن تۋعان ەلىنىڭ تۇعىرلى تۇلعالارىن جاس ۇرپاقتىڭ ويىنا قۇيىپ وسىرۋگە مىندەتتى. «ەل بولامىن دەسەڭ بەسىگىڭدى تۇزە»، دەگەن.

اقىن ورداباي ۇلى،

الماتى