Jeltoqsan batyrlary jasyl alańda dop tepti

Búgin Almaty oblysy Boraldaı eldi mekenindegi «Dáýlet» sport kesheninde Uly Otan soǵysyndaǵy Jeńistiń 80 jyldyǵyna arnalǵan «Uly Jeńis-máńgilik taǵzym» atty shaǵyn fýtboldan ardagerler arasynda Ile aýdanynyń dop dodasy ótti.

Bul týrnırge «Jeltoqsan aqıqaty» respýboıkalyq qoǵamdyq birlestiginiń batyrlaryn arnaıy qurmetpen shaqyrǵan bolatyn. Týrnırge qatysqan 10 komandanyń ishinen jastary alpystan asqan Jeltoqsan ardagerleri de tartysty oıyn kórsetip, balalarymen jasty jastarǵa qarsy ájepteýir sheberlikterin pash etti. Osylaısha «syrly aıaqtyń syry ketse de syny ketpeıdi», demekshi jeltoqsandyqtar júldege jetpese de mártebeli tórtinshi orynǵa ıe boldy.

Aýyl jastary kóz tigip tamashalaǵan aıtýly týrnırge arnaıy kelip qana qoımaı ózgeshe oıyn órnegimen jas urpaqqa úlken úlgi-ónege bolǵan Jeltoqsannyń batyrlaryna aýyl halqy erekshe qurmet kórsetip, rıza boldy. Jarys sońynda úzdik oıynshylar men jeńis tuǵyryna shyqqan komandalar uıymdastyrýshy Boraldaı aýyly Ardagerler keńesiniń tóraǵasy Nurlan Shormanov men Jeltoqsan batyry Raıa Jumanshıeva ázirlegen marapattar men aqshalaı syılyqtarǵa ıe boldy.

Jaqsy kóńil-kúıde ótken alaman dop dodasy aıaqtalǵan soń qatysýshylar uıymdastyrýshylar alqasyna zor alǵystaryn aıtyp, estelikke sýretke túsip úılerine tarqasty. Aıtpaqshy, marapattaý sátinde aıaqasty bolǵan qýanyshty kórinisti aıtpaı ketpese bolmas. Jalyndy jas jeńimpaz komandalardyń oıynshylary moıyndaryndaǵy altyn, kúmis alqalaryn sheship alyp baryp, aǵa býyn Jeltoqsan ardagerlerine qurmetpen tabys etti. Bul da bir úlkenge qurmet jasaýdy biletin naǵyz qazaqy ádeptiliktiń belgisi dep qabyldadyq.

PS.

Tek ókinishti bir nárseni aıtpasaq bolmas. Jarystyń ashylý saltanatynda bir top fýtboldan jasóspirim qazaqtyń balalary kelip qatysty. Sóz retinde olardan qazaqtyń áıgili úsh fýtbol sheberi Tımýr Segizbaev, Quralbek Ordabaev pen Seıilda Baıshaqovtardyń esimderin jáne olar kimder ekenin suraǵanymyzdy, bastaryn tómen salbyratyp jaýap bere almady. Al, Messı men Ronaldony jaqsy biletinderin maqtana aıtty. Jasóspirimderdiń ózimizdiń otandyq fýtboldyń negizin qalaǵan dańqty jandardyń esimderin bilmeı turyp, sheteldiń oıynshylaryn saırap aıtyp bergeni kóńilimizge qaıaý túsirdi. Iá, bul jerde fýtbol úıirmesiniń jattyqtyrýshylarynyń úlken qatelikteri dep aıtar edik. Adam óziniń týǵan elinde júrip ataqty tulǵalaryn bilmeý saýatsyzdyqpen birge ultynyń maqtanyshtarynan beıhabar bolýy qasiret shyǵar. Ustazdar aldymen týǵan eliniń tuǵyrly tulǵalaryn jas urpaqtyń oıyna quıyp ósirýge mindetti. «El bolamyn deseń besigińdi túze», degen.

Aqyn ORDABAIULY,

ALMATY