استاناداعى بوكستان الەم كۋبوگىنا قاتىساتىن قۇرامالار كوبەيىپ جاتىر

استانادا بوكستان الەم كۋبوگىنا قاتىساتىن قۇرامالار كوبەيىپ جاتىر. قولدا بار دەرەككە قاراعاندا، قازىر 33 مەملەكەتتىڭ بىلعارى قولعاپ شەبەرى جارىسقا دايىندالۋدا.

الەم كۋبوگىنا جەر-ءجۇزىنىڭ ۇزدىك بوكسشىلارى قاتىسادى دەپ جوسپارلانىپ وتىر. ەل قۇراماسى ءبىرىنشى قۇرامىمەن شارشى الاڭعا شىعادى.

الەم كۋبوگى جاقسىلىق ۇشكەمپىروۆ اتىنداعى جەكپە-جەك سارايىندا بولادى.

World Boxing ءتۋرنيرى ءۇش كەزەڭنەن تۇرادى. ءساۋىر ايىندا برازيليانىڭ فوس-دۋ-يگۋاسۋ قالاسىندا World Boxing اياسىندا وتكەن الەم كۋبوگىندا داۋلەت تولەمىسوۆ (85 كگ)، نۇرسۇلتان التىنبەك (55 كگ) پەن جازيرا وراقباەۆا (51 كگ) كۋبوكتىڭ يەگەرى اتاندى. ال ۇلجان سارسەنبەك (57 كگ)، دياس مولجىگىتوۆ (75 كگ) پەن دانيال ساپارباي (90 كەلىدەن اسا) قولا جۇلدەگە يە بولدى.

ەندى ءۇشىنشى كەزەڭ 21-27 شىلدە ارالىعىندا وتەدى. قازىر ونىڭ قايدا بولاتىنى بەلگىسىز.

باس جاتتىقتىرۋشى قايرات ءساتجانوۆتىڭ ايتۋىنشا، بۇل سىندا ول ءبىرىنشى ءنومىرلى بىلعارى قولعاپ شەبەرلەرىنە ءۇمىت ارتادى. ولاردىڭ اراسىندا سانجار تاشكەنباي (50 كگ)، ماحمۇد سابىرحان (55 كگ)، سەرىك تەمىرجانوۆ (60 كگ)، ەرتۋعان زەينۋللينوۆ (65 كگ)، ابىلايحان ءجۇسىپوۆ (70 كگ)، سابىرجان اققالىقوۆ (75 كگ)، نۇربەك ورالباي (80 كگ)، بەكزاد نۇرداۋلەتوۆ (85 كگ)، ساعىندىق توعامباي (90 كگ) مەن ايبەك ورالباي (90 كەلىدەن اسا) بار.

ۇلتتىق قۇراما العاشقى وقۋ-جاتتىعۋ جيىنىن 1-18 مامىر ارالىعىندا تۇركىستان وبلىسىندا وتكىزدى. ەندى دايىندىقتىڭ ەكىنشى كەزەڭى 26 مامىر-9 ماۋسىم ارالىعىندا اقمولا وبلىسى ششۋچە قالاسىندا بولادى.

سوڭعى وقۋ-جاتتىعۋ جيىنى 17-29 ماۋسىم ارالىعىندا وتەدى. بۇل — حالىقارالىق دەڭگەيدە وتەتىن بىرىككەن جاتتىعۋ جيىنى. وعان اقش، كانادا، يرلانديا، برازيليا مەن اۆستراليا ەلدەردىڭ بوكسشىلارى قاتىسادى.

داستان كەنجالين،

استانا