«رولان گارروس»: بۋبليك تاعى دا سەنساتسيا جاسادى

قازاقستاننىڭ ءبىرىنشى، الەمنىڭ 62-راكەتكاسى الەكساندر بۋبليك تەننيستەن فرانتسيانىڭ پاريج قالاسىندا ءوتىپ جاتقان «رولان گارروس» ءتۋرنيرىنىڭ شيرەك فينالىنا شىقتى، دەپ حابارلادى قازاقستان تەننيس فەدەراتسياسى.

ول ءتورتىنشى اينالىمدا الەمنىڭ 5-راكەتكاسى، ۇلىبريتانيانىڭ 23 جاستاعى سپورتشىسى دجەك درەيپەرمەن ويناپ، ونى ايقىن باسىمدىقپەن جەڭدى.

وسىعان دەيىن قارسىلاستار ءۇش رەت ويناپ، سونىڭ ەكەۋىندە درەيپەر جەڭگەن ەدى.  ال مىنا ءۇشىنشى ويىندا ولار توپىراق توسەنىشىندە العاش رەت وينادى.

ءبىرىنشى پارتيادا ەسەپ 5:5 بولعان كەزدە ۇلىبريتانيالىق سپورتشى برەيك جاساپ كەتتى. ەسەپ — 7:5. ەسەسىنە ەكىنشى سەتتە بۋبليك ەسە قايىردى. ەسەپ — 6:3. سودان كەيىن وتانداسىمىز ءۇشىنشى سەتتى 6:2 ەسەبىمەن ءبىتىرىپ، ءتورتىنشى پارتيانى برەيكپەن باستادى. ەسەپ — 2:0.  اقىرى ماتچتى 6:4 ەسەبىمەن اياقتادى.

وسىلايشا، بۋبليك العاش رەت فرانتسيا اشىق چەمپيوناتىنىڭ شيرەك فينالىنا شىقتى. ەندى ول جارتىلاي فينالعا شىعۋ ءۇشىن الەمنىڭ 1-راكەتكاسى، يتاليالىق ياننيك سيننەرمەن وينايدى.