اسحات تاعىبەرگەن قازاقستان ۇلتتىق قۇراماسىمەن قوشتاستى

بۇگىن فۋتبولدان قازاقستان قۇراماسىنىڭ كاپيتانى اسحات تاعىبەرگەن سولتۇستىك ماكەدونيا كومانداسىمەن ويىننان كەيىن ۇلتتىق قۇرامادان كەتەتىنىن ايتتى.

سولتۇستىك ماكەدونيامەن ماتچ – مەنىڭ ۇلتتىق قۇراماداعى سوڭعى ويىنىم بولدى. بۇل وتباسىممەن بىرگە اقىلداسقان شەشىمىم. ەندى جاستارعا جول بەرۋ كەرەك. ويتكەنى، فۋتبول – باسەكەگە تولى سپورت.

قازىر بۇل تۋرالى كوپ ايتىلىپ جاتىر. جالپى، جاس دەگەن – تەك پاسپورتتاعى سان. مەن بۇل ورىندى بوساتۋعا دايىنمىن.

بۇگىن ۇلتتىق قۇراما ساپىندا سوڭعى رەت الاڭعا شىقتىم. ەندى كلۋبتا ويناي بەرەمىن. بارلىق ماتچتى جۇرەككە جاقىن قابىلدادىم. اسىرەسە، «استانا ارەناداعى» 30 مىڭ جانكۇيەردىڭ قولداۋى – ۇمىتىلماس اسەر. قولداعان جانكۇيەرلەرگە مىڭ العىس.

بارشاڭىزعا اللا رازى بولسىن! ۇلتتىق قۇرامانىڭ ءبىر بولشەگى بولعانىما، كاپيتانى بولعانىما وتە قۋانىشتىمىن. راقمەت!، – دەدى اسحات تاعىبەرگەن.

اسحات تاعىبەرگەن قازاقستان قۇراماسى ساپىندا العاش رەت الاڭعا 2014 جىلى 7 ماۋسىمدا شىقتى. سول كەزدە ول ۆەنگرياعا قارسى وينادى. ۇلتتىق قۇراما ساپىندا 63 مارتە الاڭعا شىعىپ، ءۇش گول سالىپ، جەتى ناتيجەلى پاس بەردى.

داستان كەنجالين،

استانا