«ورداباسى» فۋتبول كلۋبىنىڭ بۇرىنعى باسشىلىعىنا قاتىستى قىلمىستىق ءىس قوزعالدى

2023–2024 جىلدارى «ورداباسى» فۋتبول كلۋبى 18 ويىنشىمەن جالپى سوماسى 2،3 ميلليارد تەڭگەدەن اساتىن كەلىسىمشارت جاساسقان. ونىڭ 1،9 ميلليارد تەڭگەسى ءبىر جىلدا شەتەلدىك لەگيونەرلەرگە تولەنگەن. بۇل تۋرالى شىمكەنت قالاسىنىڭ پروكۋراتۋراسى حابارلادى.

قالالىق پروكۋراتۋرانىڭ مالىمەتىنە قاراعاندا، كلۋبتىڭ بۇرىنعى باسشىلىعىنىڭ ءىس-ارەكەتتەرى لاۋازىمدى وكىلەتتىگىن تەرىس پايدالانۋ تۋرالى كۇدىك تۋدىرعان.

بۇل قاراجات نە ءۇشىن تولەندى، كىم ءبولدى جانە كىمگە ءبولدى، قاراجات قايدا جۇمسالدى — وسى سۇراقتاردىڭ بارلىعىنا جاۋاپ بەرىلۋى كەرەك. قىلمىستىق ءىس قوزعالۋىنا بايلانىستى جان-جاقتى تەكسەرۋ جۇرگىزىلىپ جاتىر. بونۋستاردى زاڭسىز ەسەپتەۋ فاكتىسى راستالدى. تەكسەرۋدى تىكەلەي پروكۋراتۋرا جۇرگىزدى جانە انىقتالعان قۇقىقبۇزۋشىلىقتار نەگىزىندە قىلمىستىق ءىس قوزعاۋ تۋرالى شەشىم قابىلداندى، — دەپ حابارلادى قالالىق پروكۋراتۋرا.

قازاقپارات اگەنتتىگىنىڭ حابارلاۋىنشا، بۇل جاعداي قوعامدا كەڭىنەن تالقىلانىپ، ۇلكەن رەزونانس تۋدىردى. بۇعان شىمكەنت قالاسىنىڭ اكىمى عابيت سىزدىقبەكوۆتىڭ كلۋبتىڭ شامادان تىس قارجىلىق مىندەتتەمەلەرى تۋرالى مالىمدەمەسى سەبەپ بولدى. اسىرەسە، ۇلتتىق قۇرامانىڭ كاپيتانى اسحات تاعىبەرگەن كوپشىلىكتىڭ قىزۋ تالقىسىنا ءتۇستى. ونىڭ اي سايىنعى جالاقىسى 20 ميلليون تەڭگە بولعان. 2025 جىلدىڭ اقپان ايىندا ونىمەن جاسالعان كەلىسىمشارت ءوزارا كەلىسىم نەگىزىندە مەرزىمىنەن بۇرىن بۇزىلدى. كەلىسىمشارتتا بىرجاقتى بۇزۋ جاعدايىندا ايىپپۇل قاراستىرىلعانىنا قاراماستان، تاراپتار ءبىر-بىرىنە قارجىلىق تالاپ قويماعان. بۇل تۋرالى قالالىق سپورت باسقارماسىنىڭ بۇرىنعى باسشىسى ماراتبەك مىقتىبەكوۆ ايتتى.

اسحات تاعىبەرگەن ەشقانداي ايىپپۇل تولەمەدى. كەلىسىمشارت ءوزارا كەلىسىم بويىنشا بۇزىلدى. مەنىڭ باسشىلىق ەتۋ كەزەڭىمدە كلۋبتا تەكسەرۋ جۇرگىزىلدى، بۇل جاسىرىن بولمادى. FIFA قورعاۋىنداعى كەلىسىمشارتقا قول قويعان بارلىق ويىنشى حالىقارالىق فۋتبول فەدەراتسياسىنىڭ باقىلاۋىندا بولدى. ال بونۋس ماسەلەسىنە كەلسەك، بۇل سۇراقتاردىڭ بارلىعى تىكەلەي قفف مەن ونىڭ باسشىلىعى ارقىلى شەشىلدى، — دەدى ماراتبەك مىقتىبەكوۆ.

قازىر وسى ءىس بويىنشا تەرگەۋ جالعاسىپ جاتىر. ەگەر بيۋدجەت پەن دەمەۋشىلەر قارجىسىنىڭ نەگىزسىز جۇمسالعانى نەمەسە جىمقىرىلعانى انىقتالسا، بۇرىنعى لاۋازىمدى ادامدار قىلمىستىق جاۋاپكەرشىلىككە تارتىلۋى مۇمكىن.