«Ordabasy» fýtbol klýbynyń burynǵy basshylyǵyna qatysty qylmystyq is qozǵaldy

2023–2024 jyldary «Ordabasy» fýtbol klýby 18 oıynshymen jalpy somasy 2,3 mıllıard teńgeden asatyn kelisimshart jasasqan. Onyń 1,9 mıllıard teńgesi bir jylda sheteldik legıonerlerge tólengen. Bul týraly Shymkent qalasynyń prokýratýrasy habarlady.

Qalalyq prokýratýranyń málimetine qaraǵanda, klýbtyń burynǵy basshylyǵynyń is-áreketteri laýazymdy ókilettigin teris paıdalaný týraly kúdik týdyrǵan.

Bul qarajat ne úshin tólendi, kim bóldi jáne kimge bóldi, qarajat qaıda jumsaldy — osy suraqtardyń barlyǵyna jaýap berilýi kerek. Qylmystyq is qozǵalýyna baılanysty jan-jaqty tekserý júrgizilip jatyr. Bonýstardy zańsyz esepteý faktisi rastaldy. Tekserýdi tikeleı prokýratýra júrgizdi jáne anyqtalǵan quqyqbuzýshylyqtar negizinde qylmystyq is qozǵaý týraly sheshim qabyldandy, — dep habarlady qalalyq prokýratýra.

Qazaqparat agenttiginiń habarlaýynsha, bul jaǵdaı qoǵamda keńinen talqylanyp, úlken rezonans týdyrdy. Buǵan Shymkent qalasynyń ákimi Ǵabıt Syzdyqbekovtiń klýbtyń shamadan tys qarjylyq mindettemeleri týraly málimdemesi sebep boldy. Ásirese, ulttyq quramanyń kapıtany Ashat Taǵybergen kópshiliktiń qyzý talqysyna tústi. Onyń aı saıynǵy jalaqysy 20 mıllıon teńge bolǵan. 2025 jyldyń aqpan aıynda onymen jasalǵan kelisimshart ózara kelisim negizinde merziminen buryn buzyldy. Kelisimshartta birjaqty buzý jaǵdaıynda aıyppul qarastyrylǵanyna qaramastan, taraptar bir-birine qarjylyq talap qoımaǵan. Bul týraly qalalyq sport basqarmasynyń burynǵy basshysy Maratbek Myqtybekov aıtty.

Ashat Taǵybergen eshqandaı aıyppul tólemedi. Kelisimshart ózara kelisim boıynsha buzyldy. Meniń basshylyq etý kezeńimde klýbta tekserý júrgizildi, bul jasyryn bolmady. FIFA qorǵaýyndaǵy kelisimshartqa qol qoıǵan barlyq oıynshy Halyqaralyq fýtbol federaııasynyń baqylaýynda boldy. Al bonýs máselesine kelsek, bul suraqtardyń barlyǵy tikeleı QFF men onyń basshylyǵy arqyly sheshildi, — dedi Maratbek Myqtybekov.

Qazir osy is boıynsha tergeý jalǵasyp jatyr. Eger bıýdjet pen demeýshiler qarjysynyń negizsiz jumsalǵany nemese jymqyrylǵany anyqtalsa, burynǵy laýazymdy adamdar qylmystyq jaýapkershilikke tartylýy múmkin.