وتانداستارىمىزدىڭ تەننيس تۋرنيرلەرىندەگى جورىعى جالعاسىپ جاتىر

الەكساندر بۋبليك، الەكساندر شەۆچەنكو، بەيبىت جۋكاەۆ، ەلەنا رىباكينا مەن يۋليا پۋتينتسەۆا «ۇلكەن دۋلىعا» تۋرنيرىندەگى جارىستارىن ودان ءارى جالعاستىرىپ جاتىر. جاستار اراسىندا ۋيمبلدوندا ءامىر ومارحانوۆ، زاڭعار نۇرلان ۇلى مەن دامير جالعاسباي (ىرىكتەۋ) وينايدى.

سول سياقتى قازاقستاننىڭ جۇپتىق سىنداعى ءبىرىنشى، الەمنىڭ 9-راكەتكاسى اننا دانيلينا ۇلىبريتانيانىڭ يستبۋرن قالاسىندا ءوتىپ جاتقان WTA 250 تۋرنيرىندە جامان ويناپ جاتقان جوق. الەمنىڭ 274-راكەتكاسى زارينا دياس تا يسپانيانىڭ كورتىنىڭ شاڭىن قاعىپ جاتىر.

ەندى ءبارىن رەت-رەتىمەن ايتساق.

بەيبىت جۋكاەۆ العاش رەت ۋيمبلدون جارىسىنا جولداما الدى

الەمنىڭ 251-راكەتكاسى بەيبىت جۋكاەۆ ۋيمبلدون ءتۋرنيرىنىڭ ىرىكتەۋ سايىسىن ءساتتى اياقتادى

ول ىرىكتەۋ سايىسىنىڭ فينالىندا الەمنىڭ 239-راكەتكاسى، فرانتسيالىق لۋكا ءپاۆلوۆيچتى جەڭدى. ءبىرىنشى پارتيادا فرانتسيالىق تەننيسشى 6:3 ەسەبىمەن باسىم ءتۇستى. بۇدان كەيىن بەيبىت جۋكاەۆ 6:3، 6:2، 7:6 (7:5) ەسەبىمەن كامبەك جاسادى.

وسىلايشا، 24 جاستاعى اقتاۋ تەننيس مەكتەبىنىڭ تۇلەگى نەگىزگى جارىسقا العاش رەت جولداما الىپ، ءوزى ءۇشىن تاريحي ناتيجەگە جەتتى. ال ميحايل كۋكۋشكين، تيموفەي سكاتوۆ پەن دميتري پوپكو ىرىكتەۋ سىنىنان وتە المادى.

بەيبىت جۋكاەۆ بىلتىر ىرىكتەۋ سايىستارىنىڭ فينالىندا فرانتسيالىق اليسسۋ كانتەنگە 3:6، 4:6، 4:6 ەسەبىمەن جول بەرىپ، نەگىزگى دودادان شەت قالعان ەدى.

ۋيمبلدون دوداسى 30 ماۋسىمدا باستالادى.

ءسويتىپ، جوعارىدا اتاپ وتكەنىمىزدەي، «ۇلكەن دۋلىعا» تۋرنيرىندە قازاقستاننان جەكەلەي سىندا الەكساندر بۋبليك، الەكساندر شەۆچەنكو، بەيبىت جۋكاەۆ، ەلەنا رىباكينا مەن يۋليا پۋتينتسەۆا ونەر كورسەتەدى. ال جاستار اراسىنداعى ۋيمبلدوندا ءامىر ومارحانوۆ، زاڭعار نۇرلان ۇلى مەن دامير جالعاسباي (ىرىكتەۋ) وينايدى.

دانيلينا  مەن بوۋزكوۆا دۋەتى دە فينالدى كوزدەپ وتىر

قازاقستاننىڭ جۇپتىق سىنداعى ءبىرىنشى، الەمنىڭ 9-راكەتكاسى اننا دانيلينا ۇلىبريتانيانىڭ يستبۋرن قالاسىندا ءوتىپ جاتقان WTA 250 ءتۋرنيرىنىڭ جارتىلاي فينالىنا شىقتى.

ول چەحيالىق ماري بوۋزكوۆامەن بىرگە شيرەك فينالدا ۇلىبريتانيالىق دجودي بيوررەدج، سوناي كارتال دەگەن تەننيسشىلەرمەن وينادى.

دانيلينا — بوۋزكوۆا دۋەتى قارسىلاستارىن 6:4، 7:6 (7:1) ەسەبىمەن جەڭىسكە جەتتى. ءبىر جارىم ساعات استام ۋاقىتقا سوزىلعان ماتچتا ەكەۋى 1 ەيسپەن بىرگە 12 برەيك-پوينتتىڭ ەكەۋىن پايدالاندى.

ەندى اننا دانيلينا — ماري بوۋزكوۆا فينالعا شىعۋ ءۇشىن كورت يەلەرى حەرريەت دارت — مايا لۋمسدەنمەن سىنعا تۇسەدى. بۇل دۋەت شيرەك فينالدا جارىستىڭ 2-راكەتكالارى، جاپونيالىق ەري حودزۋمي  مەن يندونەزيالىق الديلا ءسۋتدجياديدى 6:1، 6:4 ەسەبىمەن جەڭدى.

دياس — ءتۋرنيردىڭ ءتورتىنشى راكەتكاسى

الەمنىڭ 274-راكەتكاسى زارينا دياس يسپانيانىڭ  پالما-دەل-ريو قالاسىندا جالاۋى كوتەرىلگەن ءىTF W50 ءتۋرنيرىنىڭ ەكىنشى اينالىمىنا شىقتى.

دياس جارىستىڭ 4-راكەتكاسى بولىپ تىركەلىپ، ءبىرىنشى ويىنىن دۇنيەجۇزىلىك رەيتينگىدە 250-ورىندا تۇرعان پورتۋگاليالىق ماتيلدە جورجەمەن وينادى.

وسى ماتچتا قازاق تەننيسشىسى 6:3، 6:1 ەسەبىمەن جەڭدى. ويىن ءبىر جارىم ساعاتتان استام ۋاقىتقا سوزىلدى.

ەندى زارينا دياس شيرەك فينالعا شىعۋ ءۇشىن الەمنىڭ 551-راكەتكاسى، چەحيالىق تەرەزا مارتينتسوۆامەن كورتقا شىعادى. ول العاشقى اينالىمدا رەيتينگىدە 392-ساتىداعى پولشا وكىلى مارتينا كۋبكادان 6:4، 7:6 (9:7) ەسەبىمەن باسىم ءتۇستى.

وتانداسىمىز وسىعان دەيىن تاۋستە (يسپانيا) ITF W35 جارىسىنىڭ جەڭىمپازى اتانعان ەدى.

جىبەك جولىنان جاڭىلماي كەلەدى

جىبەك قۇلامباەۆا سەربيانىڭ كۋرسۋمليسكا بانيا قالاسىندا جالاۋى جەلبىرەگەن ITF W15 ءتۋرنيرىنىڭ شيرەك فينالىنا جولداما الدى.

ول جارىستىڭ 1-راكەتكاسى بولىپ تىركەلىپ، الدىمەن سەربيالىق الەكساندرا دجوكيچتى 6:0، 6:3 ەسەبىمەن ويسىراتا جەڭدى.

ەكىنشى اينالىمدا رەيتينگىدە 1319-ورىندا تۇرعان چەحيالىق ليۋسي ۋربانوۆامەن وينادى. بۇل ويىندا جىبەك 6:1، 1:0 ەسەبىمەن جەڭىپ جاتقان كەزدە چەحيالىق سپورتشى ماتچتى جالعاستىرۋدان باس تارتتى.

جىبەك قۇلامباەۆا جارتىلاي فينالعا شىعۋ ءۇشىن رەيتينگىدە 768-ساتىداعى بوسنيالىق سۋانا تۋكاكوۆيچپەن وينايدى.

 

داستان كەنجالين،

استانا