اقىن ورداباي ۇلىنىڭ مەرەيتويىنا ارنالعان قۇرمەتكە تولى تۋرنير

28 ماۋسىمدا الماتى قالاسىنداعى «دينامو» ستاديونىندا قازاقستان رەسپۋبليكاسىنىڭ قۇرمەتتى ازاماتى، س.بەردىكۇلوۆ اتىنداعى سىيلىقتىڭ يەگەرى، كورداي اۋدانىنىڭ قۇرمەتتى ازاماتى، بەلگىلى سپورت كوممەنتاتورى، اقىن—جازۋشى اقىن ورداباي ۇلى اعامىزدىڭ 60 جاسقا تولۋىنا وراي ارداگەرلەر اراسىندا فۋتبولدان تۋرنير ءوتتى.

بۇل تۋرنيرگە ءوزىم دە كۋا بولدىم.

ءتۋرنيردىڭ اشىلۋ سالتاناتىنا بەيجىڭ وليمپياداسىنىڭ كۇمىس جۇلدەگەرى، قازىرگى كەگەن اۋدانىنىڭ اكىمى نۇرباقىت تەڭىزباەۆ، قازاق كۇرەسىنىڭ بىلگىرى، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى ەرعالي مۇحيتدينوۆ پەن استانا قالاسىنان كەلگەن تۋريزم جانە سپورت مينيسترلىگىنىڭ وكىلى مەيرام ساپارعاليەۆ قاتىستى.

سالتاناتتى راسىمدە اقىن ورداباي ۇلى اتالعان مينيسترىلىك تاراپىنان «سپورتتى دامىتۋعا قوسقان ەرەن ەڭبەگى ءۇشىن» توسبەلگىسىمەن ماراپاتتالدى.

تۋرنيرگە بارلىعى 8 كوماندا قاتىسىپ، ءوزارا تارتىستى ويىن كورسەتتى. ناتيجەسىندە ءبىرىنشى ورىندى «قازاقفيلم» كومانداسى جەڭىپ السا، ەكىنشى ورىندى «ىلە» كومانداسى، ال ءۇشىنشى ورىندى «دينامو» كومانداسى يەلەندى.

تۋرنير قورىتىندىسى بويىنشا «ۇزدىك قورعاۋشى» اتاعىنا «دينامو» كومانداسىنىڭ كاپيتانى سايفۋتدين شامسۋتدينوۆ، «ۇزدىك قاقپاشى» اتاعىنا  مۇرات نۇركەەۆ پەن ايبەك ۇشكەمپىروۆ يە بولدى.

جارىستىڭ «ۇزدىك ويىنشىسى» اتاعىن ەلىمىزگە بەلگىلى سپورت ءجۋرناليسى ءالىم اناپيانوۆ اعامىز يەلەندى.

بۇل تۋرنير — تەك سپورتتىق باسەكە عانا ەمەس، اقىن ورداباي ۇلى اعامىزدىڭ ەل سپورتىنا قوسقان ۇلەسىن تاعى ءبىر مارتە باعالاعان، قۇرمەتكە تولى ءىس-شارا بولدى دەپ ەسەپتەيمىن.

 

 

گرەك ريم كۇرەسىنەن حالىق ارالىق سپورت شەبەرى، لەكتور ب.ت. دجيگارباەۆ

س.د.اسفەدياروۆ اتىنداعى قازۇمۋ

الماتى