الماتى وبلىسىندا قازاق كۇرەسىنەن ءداستۇرلى تۋرنير جالعاسىن تاپتى

الماتى وبلىسى، ىلە اۋدانىنىڭ ورتالىعى وتەگەن باتىر كەنتىندە قازاق كۇرەسىنەن رايىمبەك تۇكە ۇلىن ەسكە الۋعا ارنالعان ءداستۇرلى تۋرنير ءوتتى. بيىل دا ءوز جۇلدەسىن تاپقان رەسپۋبليكالىق جارىسقا ەلىمىزدىڭ ءار وبلىسىنان، الماتى، شىمكەنت قالاسىنان 20-دان اسا كوماندا قاتىستى. وسىمەن ون جەتىنشى مارتە ۇيىمداستىرىلعان تۋرنيرگە توسەلگەن قوس كىلەم ۇستىندە ەكى كۇن بويى 2002-2003 جىلى 400-گە جۋىق تۋعان جاس وسكىن بالۋاندار بارىن سالىپ بەلدەستى. ون سالماق دارەجەسىندە ۇيىمداستىرىلعان بەلدەسۋدە الماتى وبلىسىنىڭ بالۋاندارى وزا شاۋىپ كوماندالىق ەسەپتە ءبىرىنشى ورىن الدى. ەكىنشى ورىندى شىمكەنت كومانداسى يەلەنسە، ۇشتىكتى جامبىل وبلىسىنان كەلگەن بالۋاندار تۇيىندەدى. ءتۋرنيردى تاماشالاۋشىلاردىڭ كوزايىمىن اينالىپ، تاماشا بەلدەسۋ ونەرىمەن ءتانتى ەتكەن بالعىن بالۋاندارعا ارنايى سىيلىقتار، ماقتاۋ قاعازى  تابىس ەتىلدى.

–جىل سايىن ۇيىمداستىرىلعان تۋرنيردە بەلدەسىپ، شىڭدالعان بالۋانداردىڭ قاتارى ارتىپ كەلە جاتقانى قۋانتادى. بيىلعى تۋرنير ىلە اۋدانىنىڭ قۇرىلعانىنا 90 جىل تولۋ مەرەكەسىنە وراي ۇيىمداستىرىلىپ، وسى اۋدان مەن رايىمبەك اۋدانىنىڭ اكىمشىلىگى قولداۋ كورسەتىپ، مۇرىندىق بولدى. قازاقتىڭ قورعانى بولعان، ەلدىڭ اماندىعى، جەردىڭ بۇتىندىگى ءۇشىن اتتان تۇسپەي، شەكارا شەبىن كۇزەتكەن باتىر بابامىز رايىمبەك تۇكە ۇلىنىڭ ۇرپاقتارى دا جىل سايىن قارجىلاي قول ۇشىن سوزىپ، جارىستىڭ جوعارى دەڭگەيدە وتۋىنە ات سالىسىپ كەلەدى، – دەيدى ءتۋرنيردىڭ ۇيىمداستىرۋشى، بىلىكتى باپكەر، حالىقارالىق دارەجەدەگى تورەشى قاپار راۋانوۆ.

ەكى كۇنگە سوزىلعان ءتۋرنيردىڭ سالتاناتتى شاراسىن ىلە اۋدانىنىڭ  اكىمى باعدات قاراساەۆ اشىپ، بالعىن بالۋاندارعا ساتتىلىك تىلەدى. قۇرمەتتى قوناق بولىپ كەلىپ، ءتۋرنيردى تاماشالاعان وبلىستىق ءبىلىم سالاسى كاسىپوداعىنىڭ توراعاسى توققوجا ەستەنوۆ، قازاق كۇرەسى فەدەراتسياسىنىڭ تۇڭعىش پرەزيدەنتى، پروفەسسور ەرعالي مۇحيتدينوۆتار دا قۇتتىقتاۋلارىن ايتىپ، ءتۋرنيردى ۇيىمداستىرۋشىلار مەن دەمەۋشىلەرگە العىستارىن ءبىلدىردى.

قۋان جومارت

الماتى وبلىسى،

ىلە اۋدانى،

وتەگەن باتىر كەنتى.