باسقارمانىڭ ۆولەيبولدان باستاماسى

الماتى قالاسى جاستار ساياساتى باسقارماسىنىڭ «دۇيسەنبىلىك سپورت» جوباسى اياسىندا NEET ساناتىنداعى جاستار اراسىندا ۆولەيبولدان وتكەن تۋرنير مارەسىنە جەتتى.

Social project management ورتالىعىنىڭ ۇيىمداستىرۋىمەن وتكەن جارىسقا «سالامات»، «بايسات»، «التىن وردا»، «تاستاق» جانە باسقا دا بازارلاردان جانە جۇمىسسىز جاستاردان قۇرالعان 16 كوماندا قاتىستى.

العاشقى كۇن ءتۋرنيردىڭ ىرىكتەۋ ويىندارىنا ارنالدى. ءار كوماندادا قىزدار مەن جىگىتتەر ارالاس بولدى. ءتورت توپقا بولىنگەن كوماندالار ءوزارا باق سىناسىپ، كەلەسى اينالىمعا شىعاتىن كوماندالاردى انىقتاۋ ءۇشىن بارىن سالدى.

تۋرنير ەرەجەسىنە ساي كوماندالار ەكى سەت ويناۋعا ءتيىس بولدى. ەگەر ويىن 1:1 ەسەبىمەن اياقتالسا، ءۇشىنشى سەت ويناتىلدى. ءسويتىپ، جەڭىمپاز 2:1 ەسەبىمەن انىقتالىپ وتىردى.

ىرىكتەۋ ويىندارىنىڭ ناتيجەسىنە سايكەس گراند فينالعا «اقبۇلاق»، «ارىستان»، «جاڭا ياليان»، «باتىر» كوماندالارى شىقتى.

جارىس قورىتىندىسى بويىنشا ءبىرىنشى ورىندى «اقبۇلاق» بازارىنان كەلگەن كوماندا جەڭىپ الىپ، 250 مىڭ تەڭگەنىڭ سەرتيفيكاتىن قانجىعاسىنا بايلادى.

ەكىنشى ورىن «ارىستان» بازارىنىڭ ويىنشىلارىنا بۇيىردى. ولارعا 150 مىڭ تەڭگەنىڭ سەرتيفيكاتى تابىس ەتىلدى. «جاڭا ياليان» بازارى مەن «باتىر» بازارىنىڭ ۆولەيبولشىلارى ءۇشىنشى ورىندى ءوزارا ءبولىسىپ، ارقايسىسى 50 مىڭ تەڭگەدەن ولجالادى.

بۇعان دەيىن «دۇيسەنبىلىك سپورت» جوباسى اياسىندا الماتى قالاسىنداعى بازار جاستارى اراسىندا شاعىن فۋتبولدان، ۇستەل تەننيسىنەن، كيبەرسپورتتان تۋرنيرلەر وتكەن بولاتىن. بۇگىنگى ۆولەيبول جارىسى وسى جوبا اياسىندا وتكەن ءتورتىنشى تۋرنير. الداعى ۋاقىتتا باسكەتبولدان تۋرنير وتكىزۋ جوسپارلانىپ وتىر.

نازيرا بۋرحانوۆا،

الماتى