Basqarmanyń voleıboldan bastamasy

Almaty qalasy Jastar saıasaty basqarmasynyń «Dúısenbilik sport» jobasy aıasynda NEET sanatyndaǵy jastar arasynda voleıboldan ótken týrnır máresine jetti.

Social project management ortalyǵynyń uıymdastyrýymen ótken jarysqa «Salamat», «Baısat», «Altyn orda», «Tastaq» jáne basqa da bazarlardan jáne jumyssyz jastardan quralǵan 16 komanda qatysty.

Alǵashqy kún týrnırdiń irikteý oıyndaryna arnaldy. Ár komandada qyzdar men jigitter aralas boldy. Tórt topqa bólingen komandalar ózara baq synasyp, kelesi aınalymǵa shyǵatyn komandalardy anyqtaý úshin baryn saldy.

Týrnır erejesine saı komandalar eki set oınaýǵa tıis boldy. Eger oıyn 1:1 esebimen aıaqtalsa, úshinshi set oınatyldy. Sóıtip, jeńimpaz 2:1 esebimen anyqtalyp otyrdy.

Irikteý oıyndarynyń nátıjesine sáıkes grand fınalǵa «Aqbulaq», «Arystan», «Jańa Ialıan», «Batyr» komandalary shyqty.

Jarys qorytyndysy boıynsha birinshi oryndy «Aqbulaq» bazarynan kelgen komanda jeńip alyp, 250 myń teńgeniń sertıfıkatyn qanjyǵasyna baılady.

Ekinshi oryn «Arystan» bazarynyń oıynshylaryna buıyrdy. Olarǵa 150 myń teńgeniń sertıfıkaty tabys etildi. «Jańa Ialıan» bazary men «Batyr» bazarynyń voleıbolshylary úshinshi oryndy ózara bólisip, árqaısysy 50 myń teńgeden oljalady.

Buǵan deıin «Dúısenbilik sport» jobasy aıasynda Almaty qalasyndaǵy bazar jastary arasynda shaǵyn fýtboldan, ústel tennısinen, kıbersporttan týrnırler ótken bolatyn. Búgingi voleıbol jarysy osy joba aıasynda ótken tórtinshi týrnır. Aldaǵy ýaqytta basketboldan týrnır ótkizý josparlanyp otyr.

Nazıra BÝRHANOVA,

ALMATY