فيفا ەلىمىزگە 100 جاڭا شاعىن فۋتبول الاڭىن سالىپ بەرەدى

قازاقستان حالىقارالىق فۋتبول فەدەراتسياسىنىڭ (فيفا) باستاماسىمەن FIFA Arena الەمدىك ينفراقۇرىلىمدىق جوباسىنا قاتىساتىن 11 ەلدىڭ ءبىرى بولىپ تاڭدالدى.

جوبا اياسىندا ەلىمىزدىڭ مەكتەپتەرىندە قازىرگى زامان تالاپتارعا ساي 100 شاعىن فۋتبول الاڭى سالىنادى.

قولدا بار دەرەككە قاراعاندا، FIFA Arena باعدارلاماسىندا الەم بويىنشا 1000 مەكتەپ الاڭى سالىنادى دەپ جوسپارلانعان. ءاربىر الاڭنىڭ ولشەمى – 20 ح 40 مەتر. ول فيفا بەكىتكەن سوڭعى تەحنيكالىق تالاپتارعا ساي بولادى. بۇل باستاما بالالار مەن جاسوسپىرىمدەرگە قولجەتىمدى. قاۋىپسىز ءارى ساپالى ينفراقۇرىلىم قالىپتاستىرۋدى كوزدەيدى.

FIFA Arena جوباسى بويىنشا جاساندى جامىلعىنىڭ جاڭا ءتۇرى قولدانىلادى. بۇل الاڭدا رەزەڭكە ۇنتاعى قولدانىلمايدى. سوندىقتان ەكولوگيالىق جاعىنان ءتيىمدى، كۇتىپ-باپتاۋ جەڭىل جانە بالالار ءۇشىن قاۋىپسىز بولادى، — دەپ حابارلادى قازاقستان فۋتبول فەدەراتسياسى.

مەكتەپتەر ءتىزىمى وقۋ-اعارتۋ مينيسترلىگىمەن بىرلەسىپ بەكىتىلەدى. جاسىل الاڭداردىڭ قۇرىلىسى ەكى جىلدا بىتەدى. العاشقى ستاديوندار حرومتاۋ مەن كوكشەتاۋ قالالارىندا بوي كوتەرەدى.

داستان كەنجالين،

استانا