قۇرمەت تۇعىرىندا ارۋ قىزىمىز – ارۋجان

ءبىزدىڭ قازاقتىڭ قايسار قىزدارىنىڭ دوڭگەلەءتىپ الىپ كەتپەيتىن سپورت ءتۇرى جوق شىعار، ءسىرا. ءتىپتى، زىلتەمىر كوتەرۋ سەكىلدى قىز بالاعا اۋىرلاۋ سپورت تۇرلەرىندە  دە قاراكوز قىزدارىمىز الەم ارەنالارىندا اتوي سالىپ، جۇلدە سالىپ كەلەدى. سول كوپتەگەن سپورت تۇرلەرى ىشىندە كارىستىڭ تاەكۆوندو سپورتىننان دا بۇرىمدى قىزدارىمىز قۇر جاياۋ ەمەس. قازىرگى كەزدە ەل نامىسىن قورعايتىن قىزدارىمىزدىڭ  ازيا ايماعىندا الدىنا جان سالماي كەلە جاتقىنىنا بوركىمىزدى لاقتىرىپ قۋانامىز.

جۋىردا مالايزيانىڭ كۋچينگ قالاسىندا 14-17 جاس ارالىعىندا وتكەن ازيا چەمپيوناتىندا جەرلەسىمىز ارۋجان نايمانباەۆا 68 كگ سالماق دارەجەسى بويىنشا  توپ جارىپ، التىن جۇلدەگە يە بولدى. ارۋجان الدىمەن ۆەتنام ەلىنەن كەلگەن قارسىلاسىن باسىمدىلىقپەن جەڭگەن ەكەن. ەكىنشى كەزدەسۋىندە يوردانيا ەلىنىڭ سپورتشىسىن جەڭىپ، كەلەسى جارتىلاي جەكپە-جەگىندە  قىتايدىڭ مىقتى تاەكۆوندو شەبەرىمەن شىعادى. ونى دا ارۋجان  وزىنىڭ بويىنداعى قايتپاس قازاقى قايسار مىنەزى مەن شىمىر شەبەرلىگىنىڭ ناتيەجىسىندە  جەڭەدى. وسىلايشا فينالدا يران ەلىنىڭ ۇكىلىپ قوسقان شەبەرىمەن وتكەن سىندا العاشقى كەزەڭىندە جەڭىلىپ قالعانىمەن قالعان سوڭعى ەكى كەزەڭدە ارۋجان تىزگىندى قولعا الىپ،  كوزىلەسپەس جىلدامدىقپەن سوڭعى سەكۋندتا باستان تەپكەن تەپكىسى ءدال ءتيىپ جەڭىس ۇپايىن الىپ، ازيا چەمپيونى اتانادى.

سونىمەن ارۋجان نايمانباەۆا الماتى قالاسىمەن قاتار جالپى ەلىمىزدە قىزدار اراسىندا تۇڭعىش رەت وسىنداي ازيانىڭ التىن جۇلدەسىن جەڭىپ العان ارۋ بولىپ تانىلدى. قازاق قىزىنىڭ وسىنداي الامان جارىستا التىن جۇلدەگە يە بولۋى ەلىمىز ءۇشىن ۇلكەن ماقتانىش ەكەنى داۋسىز. ارۋجاننىڭ  ورىمتال جاسىنا قاراماي ۇلكەن بيىككە جەتۋىنە  جەكە جاتتىقتىرۋشىسىنىڭ ۇلەسى ايىرىقشا ەكەنىندە ءسوز جوق.

ارۋجاننىڭ بويىنداعى اللا بەرگەن تالانتىن كورە ءبىلىپ، قاسىندا ۇزدىكسىز جاتتىعىپ تەر توككەن جاتتىقتىرۋشىسى تولەگەن تەمىرلان ۇلى  تىلەۋمۇراتوۆتىڭ ەڭبەگى زور.

تولەگەن 2011 جىلدان باستاپ باپكەرلىك جولعا تۇسكەلى بەرى كوپتەگەن سپورت شەبەرلەرىن ازىرلەپ شىعارىپ ۇلتتىق قۇراماعا بىرنەشە دارىندى ۇل-قىزداردى دايىنداپ قوسقان  بىلىكتى مامان. ونىڭ ارمان ماقساتى 20028 جىلى وتەتىن وليمپيادا ويىندارىنا تالانتتى سپورتشىنى دايىنداپ جولدامانى ۇتىپ الۋ ەكەن. ءيا، اسقارالى ارمانعا تولاسسسىز توككەن تەر ارقىلى جەتەتىنىنى بەلگىلى.

ارۋجان بۇگىنگى تاڭدا قاركەن احمەتوۆ اتىنداعى وليپيادالىق رەزەرۆىنىڭ ارنايى رەسپۋبليكالىق مامانداندىرىلعان مەكتەپ-ينتەرنات كوللەدجى شاڭىراعىندا 11-سىنىپتا ءبىلىم الادى. باپكەرى تولەگەننىڭ قولىندا ايتۋلى مەكتەپ قابىرعاسىندا شەبەرلىگىن شىڭداپ وسىنداي عاجاپ جەڭىسكە جەتىپ وتىر. بۇل جەردە ەسىمدەرى الەمگە تانىمال  وليمپيادانىڭ التىن، كۇمىس، قولا جۇلدەسىن جەڭىپ العان  ەلدوس سمەتوۆ پەن وليمپيادانىڭ كۇمىس مەدالىن يەلەنگەن اسحات جيتكەەۆ سىندى نەبىر تارلانبوز تالانتتار وقىپ شىققان. سوندىقتان دا كيەلى ءبىلىم شاڭىراعىنان ارۋجانداي تالانتتاردىڭ ءوسىپ شىعۋى زاڭدىلىق دەپ بىلەمىز. ويتكەنى، «تولقىندى توقىن قۋادى»، دەمەكشى، الدىڭعى قاتارداعى اتتارى ايگىلى اعا بۋىننىڭ سپورتتاعى داڭعىل جولدارىن  كورىپ وسكەن جاس ۇرپاق جەڭىسكە ۇمتىلماي قويمايتىنى ءسوزسىز.

اقىن ورداباي ۇلى،

الماتى