Qurmet tuǵyrynda arý qyzymyz – Arýjan

Bizdiń qazaqtyń qaısar qyzdarynyń dóńgeletip alyp ketpeıtin sport túri joq shyǵar, sirá. Tipti, ziltemir kóterý sekildi qyz balaǵa aýyrlaý sport túrlerinde  de qarakóz qyzdarymyz álem arenalarynda atoı salyp, júlde salyp keledi. Sol kóptegen sport túrleri ishinde káristiń taekvondo sportynnan da burymdy qyzdarymyz qur jaıaý emes. Qazirgi kezde el namysyn qorǵaıtyn qyzdarymyzdyń  Azııa aımaǵynda aldyna jan salmaı kele jatqynyna bórkimizdi laqtyryp qýanamyz.

Jýyrda Malaızııanyń Kýchıng qalasynda 14-17 jas aralyǵynda ótken Azııa chempıonatynda jerlesimiz Arýjan Naımanbaeva 68 kg salmaq dárejesi boıynsha  top jaryp, altyn júldege ıe boldy. Arýjan aldymen Vetnam elinen kelgen qarsylasyn basymdylyqpen jeńgen eken. Ekinshi kezdesýinde Iordanııa eliniń sportshysyn jeńip, kelesi jartylaı jekpe-jeginde  Qytaıdyń myqty taekvondo sheberimen shyǵady. Ony da Arýjan  óziniń boıyndaǵy qaıtpas qazaqy qaısar minezi men shymyr sheberliginiń nátıejisinde  jeńedi. Osylaısha fınalda Iran eliniń úkilip qosqan sheberimen ótken synda alǵashqy kezeńinde jeńilip qalǵanymen qalǵan sońǵy eki kezeńde Arýjan tizgindi qolǵa alyp,  kózilespes jyldamdyqpen sońǵy sekýndta bastan tepken tepkisi dál tıip jeńis upaıyn alyp, Azııa chempıony atanady.

Sonymen Arýjan Naımanbaeva Almaty qalasymen qatar jalpy elimizde qyzdar arasynda tuńǵysh ret osyndaı Azııanyń altyn júldesin jeńip alǵan arý bolyp tanyldy. Qazaq qyzynyń osyndaı alaman jarysta altyn júldege ıe bolýy elimiz úshin úlken maqtanysh ekeni daýsyz. Arýjannyń  órimtal jasyna qaramaı úlken bıikke jetýine  jeke jattyqtyrýshysynyń úlesi aıyryqsha ekeninde sóz joq.

Arýjannyń boıyndaǵy Alla bergen talantyn kóre bilip, qasynda úzdiksiz jattyǵyp ter tókken jattyqtyrýshysy Tólegen Temirlanuly  Tileýmuratovtyń eńbegi zor.

Tólegen 2011 jyldan bastap bapkerlik jolǵa túskeli beri kóptegen sport sheberlerin ázirlep shyǵaryp ulttyq quramaǵa birneshe daryndy ul-qyzdardy daıyndap qosqan  bilikti maman. Onyń arman maqsaty 20028 jyly ótetin Olımpıada oıyndaryna talantty sportshyny daıyndap joldamany utyp alý eken. Iá, asqaraly armanǵa tolasssyz tókken ter arqyly jetetinini belgili.

Arýjan búgingi tańda Qarken Ahmetov atyndaǵy Olıpıadalyq rezerviniń arnaıy respýblıkalyq mamandandyrylǵan mektep-ınternat kolledji shańyraǵynda 11-synypta bilim alady. Bapkeri Tólegenniń qolynda aıtýly mektep qabyrǵasynda sheberligin shyńdap osyndaı ǵajap jeńiske jetip otyr. Bul jerde esimderi álemge tanymal  Olımpıadanyń altyn, kúmis, qola júldesin jeńip alǵan  Eldos Smetov pen Olımpıadanyń kúmis medalin ıelengen Ashat Jıtkeev syndy nebir tarlanboz talanttar oqyp shyqqan. Sondyqtan da kıeli bilim shańyraǵynan Arýjandaı talanttardyń ósip shyǵýy zańdylyq dep bilemiz. О́ıtkeni, «Tolqyndy toqyn qýady», demekshi, aldyńǵy qatardaǵy attary áıgili aǵa býynnyń sporttaǵy dańǵyl joldaryn  kórip ósken jas urpaq jeńiske umtylmaı qoımaıtyny sózsiz.

Aqyn ORDABAIULY,

ALMATY