Qazaq kúresinen ÁCh: Qazaqstan qorjynynda – 8 altyn, 6 kúmis, 2 qola júlde!

Astana tórinde tuńǵysh ret ótken áskerı qyzmetshiler arasyndaǵy qazaq kúresinen CISM álem chempıonaty óz máresine jetti, dep habarlady Qazaq Kuresi Assoıaııasynyń baspasóz qyzmeti.

Qazaqstan jeńil atletıka kesheninde ótken bul dúbirli doda – tek sporttyq báseke ǵana emes, ulttyq rýh pen jaýyngerlik jigerdiń toǵysqan shynaıy merekesi boldy.

Bul chempıonat — ulttyq sportymyzdyń álemdik deńgeıdegi bedelin aıqyndaǵan tarıhı beles. Bozkilemdegi ár beldesý qazaqstandyq jankúıerlerge qýanysh syılap qana qoımaı, qazaq kúresiniń tehnıkasy men fılosofııasynyń áskerı rýhpen tabıǵı úılesimin aıqyn kórsetti.

Tórtkil dúnıeniń túkpir-túkpirinen kelgen 20-dan astam eldiń tańdaýly balýandary bozkilemde baq synap, úzdikterdiń úzdigi anyqtaldy. Eki kúnge sozylǵan básekede Qazaqstan quramasy ózgelerden oq boıy ozyp, jankúıerin jarqyn jeńispen qýantty.

Ekinshi jarys kúni bizdiń balýandar altyn men kúmisti qorjynǵa molynan saldy. Atap aıtqanda, 60 kelide Ernur Súleımen altyn alsa, 74 kelide Jumajan Qojambekov jeńis tuǵyrynyń eń bıik satysyna kóterildi. +100 kelide Ǵalymjan Qyryqbaı fınalda óziniń aıbynyn asyryp, altyn júldege qol jetkizdi. Al 90 kelide óner kórsetken Aıdar Beskempir úzdik úshtikti túıindedi.

Áıelder arasynda +77 kelide Aqerke Ramazanova top jardy. Kúmis júlde ıegerleri – Saǵat Baıǵaraeva (52 kg), Baqyt Qusaqbaeva (60 kg), Roza Nysantaıqyzy (70 kg).

Osylaısha, qos kúnniń qorytyndysynda ulttyq qurama 8 altyn, 6 kúmis, 2 qola medal ıelendi. Jalpykomandalyq esepte Qazaqstan 350 upaımen aıqyn kósh bastady. Ekinshi oryn – 276 upaı jınaǵan О́zbekstan quramasyna buıyrsa, úzdik úshtikti 198 upaımen Reseı qorytyndylady.

CISM Álem chempıonaty – qazaq kúresiniń jahandyq deńgeıdegi bedelin arttyryp qana qoımaı, ony áskerı sporttyń ajyramas bóligi retinde tanytqan mańyzdy qadam boldy. Bul jarys – ulttyq sporttyń álemdik arenada qanat jaıýyna jol ashatyn jańa beles.

Chempıonat Halyqaralyq áskerı sport keńesi (CISM) aıasynda ótkizilgenin jáne Keńes Odaǵynyń Batyry Álııa Moldaǵulovanyń 100 jyldyǵyna arnalǵanyn atap ótken jón. Astana tórindegi CISM Álem chempıonaty – qazaq kúresiniń jahandyq bedelin jańa deńgeıge kótergen, áskerı sport qaýymdastyǵyna tól ónerimizdiń qýatyn aıqyn tanytqan jahandyq doda.

P.S. Bul doda – tek sporttyq jarys emes, ol – ulttyq rýhtyń, el namysynyń, qazaq kúresiniń aıbynyn tanytqan mereıli sát. Prezıdent Qasym-Jomart Toqaevtyń tapsyrmasymen qabyldanǵan jańa zań aıasynda qazaq kúresi olımpıadalyq jáne paralımpıadalyq sport túrlerimen qatar basym sport túri retinde tanyldy. Qazaq kúresiniń baıraǵyn jelbiretken bul chempıonat – bolashaqta Azııa oıyndary men  Olımpıada tórine aparar dańǵyl joldyń bastaýy bolady.