سايىپقىران: قىتايدا جەلدەن جۇيرىك قانداستارىمىز بار

بۇگىن قىتايدىڭ ءۇرىمجى قالاسىندا وتكەن جارتىلاي مارافوندا ءۇش بىردەي قانداسىمىز توپ جاردى، دەپ حابارلادى سينحۋا اگەنتتىگى. 

مارافوندا سانجى ينستيتۋتىنىڭ ستۋدەنتى، ءبىرىنشى رازريادتى سپورتشى ەرەن ەلەۋسىز مارە سىزىعىن 1 ساعات 6 مينۋت 54 سەكۋندتا كەسىپ ءوتىپ، جەڭىس تۇعىرىنا كوتەرىلدى. ونىڭ ىزىنشە قازەز بەكتۇرسىن مەن ءتۇرابىل تولەۋحان دا كومبەگە جەتىپ، كۇمىس جانە قولا مەدالداردى يەلەندى.

بۇگىنگى ءدۇبىرلى دودادا تولىق مارافون، جارتىلاي مارافون جانە 6 شاقىرىمدىق مارافون ساناتتارى بويىنشا جۇلدەلەر تىگىلىپ، جالپى 14 مىڭ ادام جارىسقا قاتىستى.

جارىس جولى ءۇرىمجى قالاسىنىڭ بىرنەشە اۋدانىن قامتىدى. ەرلەر اراسىنداعى مارافوننىڭ باس جۇلدەسىن دارىگەر-سپورتشى لي چجەنيۋە جەڭىپ السا، كۇمىس پەن قولا مەدال قانداستارىمىز دوسبول قابىلجان مەن باقتيار ورازالىعا بۇيىردى.

ەرەن ەلەۋسىز — كەيىنگى كەزدە بۇكىل قىتايعا تانىمال بولا باستاعان مارافونشى. ول بىلتىر تۇرفان جانە چجۋچجوۋ مارافوندارىندا توپ جارسا، بيىل مانشي جانە لوتيان جارتىلاي مارافوندارىندا كۇمىس جۇلدەنى العان  بولاتىن.

ريشات حايبۋللين سپورتتىق قۇزعا ورمەلەۋدەن ازيا كۋبوگىنىڭ كەزەڭىندە التىن مەدال جەڭىپ الدى

سپورتتىق قۇزعا ورمەلەۋدەن قازاقستان قۇراماسىنىڭ وكىلى ريشات حايبۋللين الماتىدا وتكەن ازيا كۋبوگى كەزەڭىندە جەڭىسكە جەتتى.

ول «جىلدامدىق» ساناتىندا ۇزدىك اتاندى.

فينالدا حايبۋللين جاپونيالىق سپورتشى تسۋكيكي ونيشيدەن باسىم ءتۇستى. ءۇشىنشى ورىنعا رە وماسا (جاپونيا) يە بولدى.

ايەلدەر اراسىندا اننا بالارشينا مارەگە ءبىرىنشى بولىپ جەتتى. ول فينالدا وتانداسى تامارا ۇلجاباەۆانى ارتتا قالدىردى. ۇزدىك ۇشتىكتەن قازاقستان قۇراماسىنىڭ وكىلى ادەليا وتەشەۆا كورىندى.

US Open: الەكساندر بۋبليك ءتورتىنشى اينالىمدا الەمنىڭ 1-راكەتكاسىمەن وينايدى

قازاقستاننىڭ ءبىرىنشى، الەمنىڭ 24-راكەتكاسى الەكساندر بۋبليك اقش اشىق چەمپيوناتىنىڭ ءتورتىنشى اينالىمىنا شىقتى.

تەننيسشى ءۇشىنشى اينالىمدا الەمنىڭ 14-راكەتكاسى، امەريكالىق توممي پولپەن وينادى. ءبىرىنشى پارتيادا تاي-برەيكتە بۋبليك شەبەرلىك تانىتتى.

ەكىنشىسىندە پول 7:6 (7:4) ەسەبىمەن جەڭسە، ءۇشىنشى سەتتە بۋبليك برەيك جاساپ، سول باسىمدىلىقتى ساقتاپ قالدى. ەسەپ — 6:3.

ءتورتىنشى سەتتە تاي-برەيكتە ت.پول 7:6 (7:5) ەسەبىمەن العا شىقتى.  بەسىنشى، شەشۋشى پارتيادا بۋبليك 6:1 ەسەبىمەن جەڭىسكە جەتتى.

ءۇش ساعات 37 مينۋتقا سوزىلعان ويىندا بۋبليك 22 ەيسپەن بىرگە 9 برەيك-پوينتتىڭ ۇشەۋىن پايدالاندى. 10 ەيس جاساعان پول 6 برەيك-پوينتتى پايدالانا المادى.

الەكساندر بۋبليك شيرەك فينالعا شىعۋ ءۇشىن الەمنىڭ 1-راكەتكاسى، يتاليالىق ياننيك سيننەرمەن وينايدى.

ەسكە سالا كەتەيىك، بۇدان بۇرىن اقش اشىق چەمپيوناتىندا اننا دانيلينانىڭ جۇپتىق سىندا ەكىنشى اينالىمعا جولداما السا، ەلەنا رىباكينا بارلىق «ۇلكەن دۋلىعا» تۋرنيرىندە وتانداستارىمىزدىڭ اراسىندا العاش رەت ءتورتىنشى اينالىمعا شىقتى.