Memleket basshysy bokstan ulttyq qurama komandany marapattady

Prezıdent Qasym-Jomart Toqaev Qazaqstan ulttyq quramasynyń múshelerin álem chempıonatyndaǵy tamasha jeńisimen quttyqtap, bul elimiz úshin tarıhı oqıǵa, halqymyz úshin úlken qýanysh ekenin atap ótti, dep habarlady Aqorda.

– Qazaqstan 68 memlekettiń arasynan úzdik shyǵyp, birinshi orynǵa ıe boldy. Álemdik básekede Ánuranymyz jeti ret shyrqaldy, Kók týymyz jeti ret jelbiredi. Barsha jurtymyz sizderge tileýles boldy. Árıne, kileń myqtylar jınalǵan jahandyq alamanda top jarý ońaı emes. Bul jetistik jyldar boıǵy tabandy eńbekpen, mańdaı termen kelgeni anyq. Bizdiń ul-qyzdarymyz bokstyń otanyna baryp, ózderiniń naǵyz myqty sportshy ekenin dáleldedi. Sanjar Táshkenbaı jáne Mahmud Sabyrhan álemniń eki dúrkin chempıony atandy. Tórehan Sabyrhan men Aıbek Oralbaıdyń erekshe ónerine jahan jurty tánti boldy. Boksshy qyzdarymyz álemdik jarysta sheberliktiń ozyq úlgisin kórsetti. Alýa Balqybekova, Aıda Ábikeeva jáne Natalıa Bogdanova altyn medal alyp, jeńis tuǵyryna kóterildi. Nazym Qyzaıbaı sharshy alańǵa birinshi bolyp shyǵyp, elimizge aqjoltaı júlde ákeldi. Vıktorııa Grafeeva jáne Eldana Tálipova qola medal jeńip aldy. Men barshańyzǵa shynaıy rızashylyǵymdy bildiremin. Qaırat Sátjanov, Eldos Saıdalın bastaǵan bapkerlerge jáne basqa da mamandarǵa zor alǵys aıtamyn, – dedi Qasym-Jomart Toqaev.

Memleket basshysy Týrızm jáne sport mınıstrligi men Ulttyq Olımpıada komıteti kóp jumys atqarǵanyna toqtalyp, Qazaqstan Boks federaııasynyń eńbegin erekshe atap ótti.

– Biz úshin jekpe-jek sportynyń orny qashanda bólek. Sonyń ishinde áıgili Shoqyr Bóltekuly negizin qalaǵan qazaq boksynyń óz tarıhy bar. О́tken ǵasyrdyń ortasynan beri kóptegen sportshymyz álemdi moıyndatty. Táýelsizdik kezeńinde aǵa býynnyń dańqty joly úzilgen joq. Jazǵy olımpıada oıyndarynan el qorjynyna túsken 15 altynnyń jeteýi – boksshylarǵa tıesili. Bul sabaqtastyq bolashaqta laıyqty jalǵasyn tabady dep senemiz. Oǵan barlyq múmkindik bar, – dedi prezıdent.

Qasym-Jomart Toqaev elimizde jastardyń sportpen shuǵyldanýyna jaǵdaı jasalǵanyn, ınfraqurylymdy jaqsartýǵa basa mán berilip jatqanyn aıtty.

– Balalarǵa arnalǵan jattyǵý zaldary, úıirmeler ashylýda. Aýyldyq jerlerde zamanǵa saı sport keshenderi boı kóterýde. Meniń tapsyrmammen bıyl Ulttyq sport ýnıversıteti ashylady. Boksty damytýǵa arnalǵan naqty sharalar qolǵa alynyp jatyr. Jalpy, bizdiń elimizdiń bokstaǵy áleýeti orasan zor. Muny álemdik sport qaýymdastyǵy da moıyndaıdy. Sportshylarymyz – óte daryndy, álem chempıondary az emes. Sondyqtan memleket boksqa basymdyq berip, ony udaıy nazarda ustaıdy. Osy baǵyttaǵy jumys júıeli túrde júrgizilýge tıis. Biz boksty ulttyq sport deńgeıine kóterýimiz kerek. Bul – óte mańyzdy mindet, – dedi Memleket basshysy.

Prezıdenttiń aıtýynsha, World Boxing aıasynda alǵash ret ótken álem chempıonatyndaǵy nátıje – ulttyq quramanyń birlesken jumysynyń jemisi. Boksshylar, bapkerler, menedjerler, sport dárigerleri men basshylar birigip, búgingi jetistikke jetti.

– Sondyqtan jeńis tuǵyrynan kóringen sportshylarmen qatar, bul aıtýly jeńiske úles qosqan árbir azamatty qurmetteýimiz kerek. Bokstaǵy joǵary básekelestikti, sondaı-aq ony damytýdyń zamanaýı úderisteri paıda bolǵanyn eskere otyryp, Ulttyq quramany daıarlaýǵa kásibı mamandardy tartyp, ozyq ınnovaııalyq sheshimderdi belsendi engizý qajet, – dedi memleket basshysy.

Qasym-Jomart Toqaev dańqty sportshy Gennadıı Golovkınge boksty Olımpıada oıyndarynyń baǵdarlamasyna qaıtarýǵa atsalysqany úshin rızashylyǵyn bildirdi.

– Álemdik saıysta el namysyn qorǵaý – zor mártebe ári úlken jaýapkershilik. Sizderdiń jeńisterińiz jastardyń sportqa degen qulshynysyn arttyrady. Sportshylarymyz ult saýlyǵyn jaqsartýǵa úles qosyp jatyr dep aıtýǵa bolady. Chempıon bolý – el mereıin asyrý degen sóz. Sportshylardyń dańqy – barsha halyqtyń dańqy. Olardyń mártebesi – búkil memlekettiń mártebesi. Sondyqtan biz sportshylarymyzdyń ár jetistigin maqtan tutýymyz kerek. Bir el bolyp, chempıondarymyzdy ulyqtap, olardyń eńbegin joǵary baǵalap, qoǵamda jan-jaqty dáripteýimiz qajet. Munyń bári sportty nasıhattap, salamatty qoǵam qurý úshin óte mańyzdy. Memleket sizderdi árdaıym qoldaıdy, – dedi prezıdent.

Memleket basshysy álemge áıgili sportshy bolý úlken jaýapkershilik júkteıtinine, jastardyń chempıondarǵa qarap boı túzeıtinine nazar aýdardy. Sondyqtan sózben, ispen, kúndelikti minez-qulyq, júris-turyspen, ádep-daǵdymen kópke úlgi bolý óte mańyzdy dep atady.

– Jastardy otanshyl, eńbekqor, bilimpaz, tártipti, jınaqy, uıymshyl, janashyr bolýǵa baýlý kerek. Men sizderdi chempıon degen atqa laıyq elimizdiń myqty sportshylary dep esepteımin. Jalpy, úlken sportta bıikke kóterilý ońaı emes ekeni belgili. Al sol bıikte qalý – odan da qıyn jumys. Sondyqtan jetken jetistikke masaırap, bosańsýǵa bolmaıdy. Aldymyzda turǵan úlken beles – Los-Andjelestegi jahandyq doda. Olımpıadanyń jeńis tuǵyryna shyǵý – ár sportshynyń armany. Búkil Qazaqstan halqy sizderge senedi, úmit artady. El senimin aqtaý úshin qazirden bastap daıyndyqqa kirisý kerek. Men ulttyq quramanyń osy jeńisin Olımp shyńyna bastaıtyn mańyzdy qadam dep sanaımyn, – dedi Qasym-Jomart Toqaev.

Saltanatty basqosýda álem chempıondary Aıbek Oralbaı men Natalıa Bogdanova sóz sóıledi.

Memleket basshysy Lıverpýl qalasynda ótken erler men áıelder arasyndaǵy bokstan álem chempıonatyndaǵy (World Boxing) sporttyq joǵary jetistikteri úshin bir top sportshy men bapkerdi marapattady.

 

«Qurmet» ordenimen:

1. Qaraǵandy oblysy dene shynyqtyrý jáne sport basqarmasy Joǵarǵy sport sheberligi mektebiniń bokstan jattyqtyrýshysy Islam Ábdiraıymov;
2. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Aıda Ábikeeva;
3. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Alýa Balqybekova;
4. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Natalıa Bogdanova;
5. Soltústik Qazaqstan oblysy ákimdiginiń dene shynyqtyrý jáne sport basqarmasy Joǵarǵy sport sheberligi mektebiniń bokstan jattyqtyrýshysy Dastan Qabdenov;
6. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń bokstan jattyqtyrýshysy Nurjan Nasanov;
7. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Aıbek Oralbaı;
8. Shymkent qalasy dene shynyqtyrý jáne sport basqarmasy № 12 balalar men jasóspirimder sport mektebiniń jattyqtyrýshysy Ilııas Oralbekov;
9. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Mahmud Sabyrhan;
10. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Tórehan Sabyrhan;
11. Týrızm jáne sport mınıstrliginiń Sport jáne dene shynyqtyrý isteri komıtetiniń Sportty damytý dırekııasy bokstan Qazaqstan Respýblıkasynyń ulttyq qurama komandasynyń bas jattyqtyrýshysy Eldos Saıdalın;
12. Týrızm jáne sport mınıstrliginiń Sport jáne dene shynyqtyrý isteri komıtetiniń Sportty damytý dırekııasy bokstan Qazaqstan Respýblıkasynyń ulttyq qurama komandasynyń bas jattyqtyrýshysy Qaırat Sátjanov;
13. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Sanjar Táshkenbaı marapattaldy.

 

«Eren eńbegi úshin» medali:

1. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Vıktorııa Grafeevaǵa;
2. Almaty qalasy sport basqarmasy № 6 Olımpıadalyq rezervtegi balalar-jasóspirimder mamandandyrylǵan mektebiniń jattyqtyrýshy-oqytýshysy Nurlan Muhambetqalıevqa;
3. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Eldana Tálipovaǵa berildi.

 

Qazaqstan Respýblıkasy Prezıdentiniń Alǵysy:

1. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń bokstan jattyqtyrýshysy Asqar Erkebaevqa;
2. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń nusqaýshy-sportshysy Nazym Qyzaıbaıǵa;
3. Týrızm jáne sport mınıstrliginiń Sport jáne dene shynyqtyrý isteri komıteti Sportty damytý dırekııasynyń bokstan jattyqtyrýshysy Dolkýnjan Kamekovke jarııalandy.

 

Foto: Aqorda