III ТМД елдері ойындары: Қазақстан жүзуден 19 жүлде алды

Бүгін Әзербайжанның Гянджа қаласында жүзуден III ТМД елдері ойындарының соңғы жүлделері сарапқа салынды, деп хабарлады Туризм және спорт министрлігі Спортты дамыту дирекциясының баспасөз қызметі.

Қазақстан спортшылары 4 дисциплинада сынға түсіп, соның ішінде 2 күміс, 1 қола медаль иеленді. Жүлдегерлер:

Тайисия Короткова (кешенді жүзу, 400 м) – күміс медаль

Қазақстан ұлдар құрамасы (кешенді жүзу, 4х100 м) – күміс жүлде

Қазақстан құрамасы, микст (кешенді жүзу, 4х100 м) – қола медаль.

Гянджа қаласында жүзуден 5 күнге созылған жарыста Қазақстан құрамасы барлығы 9 күміс және 10 қола жүлде жеңіп алды. Команда сапындағы көшбасшының бірі Тайисия Короткова жоғары даярлығын көрсетіп, жекелей және командалық сынды қосқанда 9 жүлдеге ие болды.

Кешенді жарыс Әзербайжанның Гянджа, Евлах, Мингячевир, Габала, Шеки, Гейгёль мен Ханкенді сынды 7 қаласында қатар болып жатыр. Биыл додаға 13 елден барлығы 1600-ден астам спортшы жиналды. Олар 23 дисциплинада өзара жүлдеге таласып жатыр. III ТМД елдері ойындары 8 қазанда мәресіне жетеді.

Қазір Қазақстан 2 алтын, 13 күміс және 24 қола медальмен жалпыкомандалық есепте 5-орында тұр.