قازاق پالۋاندارى پولشادان جۇلدەمەن ورالدى

پولشانىڭ ولەسنيتسا قالاسىندا دزيۋدو كۇرەسىنەن  وتكەن ەۋروپا كۋبوگى ءۇشىن جارىستا قازاقستاننىڭ نامىسىن قورعاعان  11 پالۋاننىڭ اراسىنان ك.احمەتوۆ اتىنداعى مەكتەپ-ينتەرناتتىڭ ءتورت بىردەي ورەنى جەڭىس بيىگىنە شىعىپ، قازاقستاننىڭ كوماندالىق ءبىرىنشى ورىندى جەڭىپ الۋىنا زور ۇلەستەرىن قوستى.

ەندى جەڭىس تۇعىرىنا كوتەرىلگەن ساڭلاقتارىمىزدىڭ ەسىمدەرىمەن تانىستىرساق. قوس بىردەي التىن جۇلدەنى ەل قورجىنىنا سالىپ بەرگەن  60 كگ سالماقتا ءبىلال بولات مەن 90 كگ اۋىر سالماقتا كۇرەسكەن سەرىكبولسىن شىنتاستىڭ ەسىمدەرىن دزيۋدو كۇرەسىنىڭ جانكۇيەرلەرى جاتتاپ العانى ءجون. ويتكەنى، بولاشاعىنا زور سەنىممەن قاراتا بىلگەن  بۇل ەكى بالۋاننىڭ  ەسىمدەرىن ءالى تالاي الەمدىك دەڭگەيدەگى بايراقتى جارىستاردا ەستيتىن بولارمىز دەگەن سەنىم بار.

سونىمەن قاتار،  55 كگ سالماقتا  كۇمىس جۇلدەگە يە بولعان ۇلىقبەك ابىلقايىر مەن قولا جۇلدەمەن قۋانتقان 73 كگ سالماقتاعى ايبار مۇقىشەۆتىڭ  دە جەكپە-جەكتەرى مامانداردىڭ كوڭىلىنەن ۇلكەن ورىن الا ءبىلدى. ءيا، جاتتىقتىرۋشى بالۋانعا ەكىنشى اكەسىندەي قامقور، جاناشىر ءارى تاربيەشى دەپ بىلەمىز. پالۋاننىڭ جاقسى كورسەتكەن  ناتيجەلەرىنە قاراپ باپكەرىنىڭ دە قوسقان ۇلەسىن ەسكەرىپ وتىرعان ءجون شىعار. الەم كۋبوگى ءۇشىن وتكەن بەلدەسۋلەردە ك. احمەتوۆ اتىنداعى مەكتەپ-ينتەرناتتىڭ جاستارىنىڭ تابىستى كورسەتكىشتەرىنە اعا جاتتىقتىرۋشى نۇربەك مىقتىبەكوۆ پەن قانات جۇلدىزقانوۆتىڭ  سىڭىرگەن ەڭبەكتەرى  ەرەكشە دەپ ايتار ەدىك. كۇرەس دەسە، سەلت ەتىپ، دەلەبەسە قوزبايتىن قازاق جوق شىعار. ەگەر ول جانكۇيەر  عانا ەمەس، ءوزى كەزىندە ەل بىرىنشىلىگىندە كۇرەسىپ تالاي رەت جەڭىس بيىگىنە كوتەرىلگەن ايلالى بالۋان ءارى بىلىكتى باسشى بولسا ءسوز باسقاشا. ايتقالى وتىرعانىمىز، كارى قۇرىلىقتا قازاقستاننىڭ نامىسىن قورعاۋعا اتتانعان بالۋانداردىڭ جانىندا بىرگە بولىپ، اقىل كەڭەسىن ءبولىسىپ، تۇعىرلى جەڭىستەرىن ءوز كوزىمەن كورىپ قايتقان كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ ديرەكتورى، ارداگەر بالۋان سەيىلحان باقتىعالي ۇلى قاراقوۆتىڭ ساپارىنىڭ ءساتتى بولعانىنىنىڭ كۋاسى بولىپ وتىرمىز. ويتكەنى،  ەل نامىسىن قورعاعان پالۋانداردىڭ اراسىندا ايتۋلى مەكتەپ-ينتەرناتتىڭ اتىنان قاتىسقان التى بالۋاننىڭ تورتەۋى  جەڭىس تۇعىرىنا كوتەرىلىپ، 2 التىن، 1 كۇمىس، 1 قولا مەدالدەردى جەڭىپ الىپ بەردى.  بىر عانا مەكتەپ ءۇشىن بۇل جەتىستىكتى ماقتانىشپەن ايتۋعا بولارى ءسوزسىز. ەندى بۇل بالۋاندارىمىز قولدى ءبىر مەزەت تومەن تۇسىرمەۋگە مىندەتتى. ويتكەنى، الدا ءالى تالاي دودالى جەكپە-جەكتەر دارىندى جاستاردى  كۇتىپ تۇر.

اقىن ورداباي ۇلى،

الماتى