Paravoleıboldan ulttyq qurama álem kýbogynda qola júlde aldy

AQSh-tyń Fort-Ýeın qalasynda voleıboldy otyryp oınaýdan álem kýbogy úshin jarys aıaqtaldy.

Bul synda Qazaqstan quramasy qola júlde úshin AQSh quramasymen oınady.

Baýyrjan Tahaýov jasaqtaǵan qurama komanda alǵashqy eki partııada amerıkalyqtardan 25:23, 25:18 esebimen basym tústi. Sodan keıin alań ıeleri kelesi sette 25:15 esebimen jeńdi. Degenmen tórtinshi sette otandastarymyz taǵy alǵa shyqty. Esep — 25:23. Sóıtip, qorytyndy esepte Qazaqstan komandasy 3:1 esebimen jeńiske jetti.

Bul týrnır 2028 jyly Los-Andjeleste ótetin Paralımpıada oıyndaryna qatysý úshin reıtıngilik upaı beredi. Osy dodada paravoleıbolshylar úzdik úshtikten kórindi.

Toptyq kezeńde Qazaqstan quramasy sońǵy matchta Taılandty 3:0 (25:15, 25:8, 25:14) esebimen jeńgen edi. Tek jartylaı fınalda ǵana Mysyrǵa 0:3 (12:25, 23:25, 18:25) esebimen ese jiberdi.

Rústem JUMAN,

ASTANA