SportPress.kz قازاقستان سپورت جاڭالىقتارى
بۇگىن جاپونيانىڭ استاناسى توكيودا XXV جازعى سۋردليمپيا ويىندارى مارەسىنە جەتتى. قازاقستان ۇلتتىق قۇراماسى 8 التىن، 4 كۇمىس جانە 13 قولا مەدال جەڭىپ الدى، دەپ حابارلادى تۋريزم جانە سپورت مينيسترلىگى.
-ەڭ كوپ جۇلدەگە سۋردو دزيۋدو سپورتشىلارى يە بولدى. اتالعان سپورت تۇرىنەن وتاندىق سپورتشىلار 5 التىن، 2 كۇمىس جانە 4 قولا مەدال الىپ، بارلىعى 11 جۇلدەنى يەلەندى. وسى ناتيجەمەن قازاقستان دزيۋدوشىلارى جالپىكوماندالىق ەسەپتە ءبىرىنشى ورىنعا شىعىپ، تاريحي ءارى رەكوردتىق جەتىستىككە جەتتى. بۇل – ەلىمىزدىڭ سۋردو دزيۋدو تاريحىنداعى ەڭ ۇزدىك ناتيجە، — دەلىنگەن حابارلامادا.
بالۋاندار دا ەل قورجىنىنا بىرنەشە جۇلدە سالدى. اتاپ ايتقاندا، ەركىن كۇرەس شەبەرلەرى 1 التىن، 1 كۇمىس جانە 3 قولا مەدالعا يە بولسا، گرەك-ريم كۇرەسىنىڭ وكىلدەرى تولىق مەدال جيىنتىعىن (التىن، كۇمىس جانە قولا) ەنشىلەدى.
جەڭىل اتلەتيكادان قازاقستان قۇراماسى 1 التىن جانە 1 قولا مەدال يەلەندى. فاينا مەيىرمانوۆا بيىكتىككە سەكىرۋ سايىسىندا 1،79 مەتر ناتيجەمەن سۋردليمپيادا چەمپيونى اتانىپ، جارىستىڭ رەكوردىن جاڭارتتى. بۇعان دەيىنگى رەكورد – 1،75 مەتر بولاتىن. ونى 2013 جىلى بولگاريادا وتكەن سۋردليمپيادادا بەلارۋس سپورتشىسى مارگاريتا حرالكو تىركەگەن ەدى.
ۇلتتىق قۇرامانىڭ قورجىنىنا تاەكۆوندو شەبەرلەرى 3 قولا مەدال سالسا، ۇستەل تەننيسىنەن ەرلەر كومانداسى كوماندالىق ەسەپتە قولا جۇلدەگەر اتاندى.
-ەلىمىزدىڭ سۋردو سپورتشىلارى حالىقارالىق جارىستاردا باسەكەگە قابىلەتتى ەكەنىن دالەلدەدى. جارىستىڭ العاشقى كۇنىنەن باستاپ قازاقستان قۇراماسى 81 ەلدىڭ ىشىندە ۇزدىك بەستىكتىڭ قاتارىنان كورىندى. بۇل – مۇمكىندىگى شەكتەۋلى جاندار سپورتىنىڭ جۇيەلى دامۋى مەن مەملەكەتتىك قولداۋدىڭ ناتيجەسى. الداعى ۋاقىتتا سپورتشىلارىمىزدىڭ الەۋەتىن ارتتىرۋعا جانە جوعارى ناتيجەلەرگە جەتۋىنە جان-جاقتى قولداۋ كورسەتۋدى جالعاستىرامىز، – دەدى تسم سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى نۇرلان ەسەمباەۆ.
XXV جازعى سۋردليمپيا ويىندارى جاپونيا استاناسى – توكيودا جالاۋىن جەلبىرەتتى. ەستۋ قابىلەتى بۇزىلعان سپورتشىلار اراسىندا ۇيىمداستىرىلاتىن بۇل بەدەلدى حالىقارالىق دودا ءتورت جىلدا ءبىر رەت وتكىزىلەدى. بايراقتى دودادا 81 ەلدەن كەلگەن 3 000-عا جۋىق سپورتشى 21 سپورت ءتۇرى بويىنشا 209 ديستسيپلينادا ءوزارا مىقتىنى انىقتادى. قازاقستان قۇراماسىنان 78 سپورتشى 8 سپورت تۇرىنەن سىنعا ءتۇستى.
