Qazaqstan quramasy XXV jazǵy Sýrdlımpıadada 25 medal aldy

Búgin Japonııanyń astanasy Tokıoda XXV jazǵy Sýrdlımpııa oıyndary máresine jetti. Qazaqstan ulttyq quramasy 8 altyn, 4 kúmis jáne 13 qola medal jeńip aldy, dep habarlady Týrızm jáne sport mınıstrligi.

-Eń kóp júldege sýrdo dzıýdo sportshylary ıe boldy. Atalǵan sport túrinen otandyq sportshylar 5 altyn, 2 kúmis jáne 4 qola medal alyp, barlyǵy 11 júldeni ıelendi. Osy nátıjemen Qazaqstan dzıýdoshylary jalpykomandalyq esepte birinshi orynǵa shyǵyp, tarıhı ári rekordtyq jetistikke jetti. Bul – elimizdiń sýrdo dzıýdo tarıhyndaǵy eń úzdik nátıje, — delingen habarlamada.

Balýandar da el qorjynyna birneshe júlde saldy. Atap aıtqanda, erkin kúres sheberleri 1 altyn, 1 kúmis jáne 3 qola medalǵa ıe bolsa, grek-rım kúresiniń ókilderi tolyq medal jıyntyǵyn (altyn, kúmis jáne qola) enshiledi.

Jeńil atletıkadan Qazaqstan quramasy 1 altyn jáne 1 qola medal ıelendi. Faına Meıirmanova bıiktikke sekirý saıysynda 1,79 metr nátıjemen Sýrdlımpıada chempıony atanyp, jarystyń rekordyn jańartty. Buǵan deıingi rekord – 1,75 metr bolatyn. Ony 2013 jyly Bolgarııada ótken Sýrdlımpıadada Belarýs sportshysy Margarıta Hralko tirkegen edi.

Ulttyq quramanyń qorjynyna taekvondo sheberleri 3 qola medal salsa, ústel tennısinen erler komandasy komandalyq esepte qola júldeger atandy.

-Elimizdiń sýrdo sportshylary halyqaralyq jarystarda básekege qabiletti ekenin dáleldedi. Jarystyń alǵashqy kúninen bastap Qazaqstan quramasy 81 eldiń ishinde úzdik bestiktiń qatarynan kórindi. Bul – múmkindigi shekteýli jandar sportynyń júıeli damýy men memlekettik qoldaýdyń nátıjesi. Aldaǵy ýaqytta sportshylarymyzdyń áleýetin arttyrýǵa jáne joǵary nátıjelerge jetýine jan-jaqty qoldaý kórsetýdi jalǵastyramyz, – dedi TSM Sport jáne dene shynyqtyrý isteri komıteti tóraǵasynyń orynbasary Nurlan Esembaev.

XXV jazǵy Sýrdlımpııa oıyndary Japonııa astanasy – Tokıoda jalaýyn jelbiretti. Estý qabileti buzylǵan sportshylar arasynda uıymdastyrylatyn bul bedeldi halyqaralyq doda tórt jylda bir ret ótkiziledi. Baıraqty dodada 81 elden kelgen 3 000-ǵa jýyq sportshy 21 sport túri boıynsha 209 dısıplınada ózara myqtyny anyqtady. Qazaqstan quramasynan 78 sportshy 8 sport túrinen synǵa tústi.