وليمپيالىق ويىنداردىڭ الاۋى جاعىلدى

ەجەلگى وليمپيادا (گرەكيا) 2026 جىلى ميلان مەن كورتينا-د’امپەتستسودا وتەتىن قىسقى وليمپيالىق ويىنداردىڭ الاۋى سالتاناتتى تۇردە جاعىلدى، دەپ حابارلادى ۇلتتىق وليمپيالىق كوميتەت.

اۋا رايىنىڭ قولايسىزدىعىنا بايلانىستى ءراسىم ءداستۇر بويىنشا گەرا حرامىندا ەمەس، ارحەولوگيالىق مۇراجايدىڭ ىشكى زالىندا بولدى. باس ءدىني قىزمەتكەردىڭ ءرولىن بيىل دا اكتريسا مەري مينا اتقاردى.

سالتاناتتى ءىس-شاراعا گرەكيا پرەزيدەنتى كونستانتينوس تاسۋلاس، حالىقارالىق وليمپيالىق كوميتەتتىڭ باسشىسى كيرستي كوۆەنتري، 2026 جىلعى وليمپيادا جانە پاراليمپيادا ويىندارى ۇيىمداستىرۋ كوميتەتىنىڭ باسشىسى دجوۆانني مالاگو جانە وزگە دە قوناقتار قاتىستى.

-بۇل ءراسىم — وليمپيالىق ويىنداردىڭ بەيبىت باسەكە، دوستىق جانە ءوزارا قۇرمەت رۋحىندا ادامداردى بىرىكتىرۋگە قۇرىلعان باستى يدەياسىن ەسكە سالادى.

2026 جىلى ميلان-كورتينادا وتەتىن XXV قىسقى وليمپيادا ويىندارىنىڭ الاۋىن جاعۋ ارقىلى، ءبىز بۇل جارىقتى وتكەننەن بۇگىنگە ءارى بولاشاققا جالعايمىز. بۇل ءبىز بارلىعىمىز كورگىمىز كەلەتىن ورتاق بولاشاق.

جاقىندا الاۋ يتالياعا جول تارتادى. بۇل ەلدە قۇشتارلىق سەزىمى ادامداردىڭ جۇرەگىنەن تەرەڭ ورىن العان. ميلاننىڭ سەرپىندى اتموسفەراسىنان باستاپ، الىپ دولوميت جانە يتاليا الپىسىنە دەيىن جەتەتىن بۇل قۇشتارلىق سەزىمى سپورتشىلار مەن جانكۇيەرلەردى شابىتتاندىراتىن بولادى. ول يتاليانىڭ بارشا الەممەن بولىسەتىن ءاربىر ساتىندە كورىنىس تاۋىپ، وليمپيادانىڭ جۇرەك سوعىسىنا اينالادى، — دەدى كيرستي كوۆەنتري.

الاۋدى ەڭ العاش كوتەرگەن — 2024 جىلعى وليمپيادا جۇلدەگەرى پەتروس گايداتسيس. گرەكيا اۋماعىنداعى قىسقا ەستافەتادان كەيىن الاۋ ريمگە جەتكىزىلەدى.

يتالياداعى ەستافەتا ەلدىڭ بارلىق 110 پروۆينتسياسىن ارالاپ وتەدى جانە 6 اقپانعا دەيىن جالعاسادى. ميلانداعى «سان-سيرو» ستاديونى ەستافەتانىڭ سوڭعى نۇكتەسى بولادى. وندا 2026 جىلعى وليمپيادا ويىندارىنىڭ اشىلۋ سالتاناتى وتەدى.