شاحماتتان اچ: قازاقستان كومانداسى بەس التىن جۇلدەمەن كەلە جاتىر

تايلاندتىڭ استاناسى بانگكوك قالاسىندا  شاحماتتان XXVII جاسوسپىرىمدەر اراسىنداعى ازيا چەمپيوناتى اياقتالدى، دەپ حابارلادى قازاقستان شاحمات فەدەراتسياسى.

ءجاسوسپىرىم شاحماتشىلار باعدارلامانىڭ ءۇش ءتۇرى – كلاسسيكا، راپيد جانە بليتس بويىنشا 11 مەدال جەڭىپ الدى. ونىڭ بەسەۋى – التىن جۇلدە.

ميلانا فيليپپوۆا (G10) مەن ماريا حولياۆكو (G14) – كلاسسيكادا، ءامىرجان انەتوۆ (O10) – راپيدتە، الىشەر ءابدىساتتار (O14) مەن ءاسيا اسىلحان (G16) – بليتستە ازيا چەمپيونى اتاندى.

ازيا دوداسى 21–29 قاراشا ارالىعىندا بولدى. وعان 33 ەلدەن جانە سول توڭىرەكتەن شامامەن 700 ادام قاتىستى (27th Asian Youth Chess Championships 2025).

العاشقى كۇنى 15+5 ۋاقىت باقىلاۋىمەن 7 تۋرلىق «شۆەيتسار» جۇيەسىندە وتكەن راپيدتە جۇلدەلەر ساراپقا سالىندى (O10 ساناتىندا ازيا چەمپيونى ءامىرجان انەتوۆ اتاندى. قولا مەدال ونىڭ قۇرداسى اليحان نازاربەككە بۇيىردى). وسىدان كەيىن جاس شاحماتشىلار باعدارلامانىڭ ەكىنشى بولىگى – 90+30 ۋاقىت باقىلاۋىمەن وتەتىن 9 تۋرلىق كلاسسيكاعا كوشتى. مۇندا قازاق جاستارى 5 مەدال جەڭىپ الدى.

ميلانا فيليپپوۆا (G10) مەن ماريا حولياۆكو (G14) ازيا چەمپيونى اتانسا، ريزات ۇلان (O10)، ءاديا جەڭىس (G12) پەن ياسمينا الەمانوۆا (G16) قولا جۇلدەنى قاناعات تۇتتى.

كلاسسيكانىڭ سوڭعى تۋرى اياقتالا سالىسىمەن، باعدارلامانىڭ ءۇشىنشى ءتۇرى – 3+2 ۋاقىت باقىلاۋىمەن وتەتىن ءبليتستىڭ 9 تۋرى باستالدى.

بىرەۋلەر ءۇشىن بۇل جان-جاقتى ويناي الاتىنىن دالەلدەۋ مۇمكىندىگى بولسا، ەندى بىرەۋلەر ءۇشىن الدىڭعى كەزەڭدەردەگى ساتسىزدىكتەردى تۇزەتۋگە ارنالعان سوڭعى مۇمكىندىك بولدى.

قازاقستان كومانداسى وسى مۇمكىندىكتى تولىق پايدالاندى. استانالىق الىشەر ءابدىساتتار (O14) پەن تۇركىستان وبلىسىنان جارىسقا قاتىسقان ءاسيا اسىلحان (G16) قۇرمەت تۇعىرىنىڭ ەڭ بيىك ساتىسىنا كوتەرىلسە، كۇمىس مەدالدى پاۆلودارلىق اسمان بايانتاس (O18) يەلەندى. ال قولا مەدال استانالىق ءالىمجان جاۋىنبايعا (O12) بۇيىردى.

بۇعان دەيىن مەملەكەت باسشىسى قاسىم-جومارت توقاەۆ الەم چەمپيوناتتارىندا توپ جارعان ءبىر توپ جاس شاحماتشىمەن كەزدەسكەن بولاتىن.

كەزدەسۋگە 8 جاسقا دەيىنگى ساناتتا الەم چەمپيوندارى اتانعان ءادينۇر ادىلبەك پەن اليشا بيساليەۆا، 12 جاسقا دەيىنگى ساناتتا الەم چەمپيونى بولعان دانيس قۋاندىق ۇلى، 14 جاسقا دەيىنگى ساناتتا الەم چەمپيوناتىندا جەڭىس تۇعىرىنان كورىنگەن مارك سميرنوۆ، 16 جاسقا دەيىنگى سانات بويىنشا الەم چەمپيوناتىندا التىننان القا تاققان ەدگار مامەدوۆ، 16 جاسقا دەيىنگى شاحماتشىلار اراسىندا الەم چەمپيوناتىنىڭ كۇمىس جۇلدەسىن يەلەنگەن ساۋات نۇرعاليەۆ قاتىستى.

مەملەكەت باسشىسىنىڭ ايتۋىنشا، جاس سپورتشىلاردىڭ جەتىستىكتەرى حالىقارالىق ارەنادا قازاقستاننىڭ مەرەيىن ۇستەم ەتەدى ءارى ەلىمىزدە شاحماتتىڭ كەلەشەگى زور ەكەنىن كورسەتەدى. پرەزيدەنت چەمپيونداردىڭ بيىك ماقساتتارعا ۇمتىلۋى قاجەتتىگىن جەتكىزىپ، ولارعا جارقىن جەڭىستەر تىلەدى.

– شاحمات دەگەن ۇلكەن ونەر. سوندىقتان شاحماتپەن كۇندەلىكتى، مۇقيات، ارنايى كىتاپتاردى وقي وتىرىپ اينالىسۋ قاجەت. بۇگىن حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچپەن كەزدەسىپ وتىرسىزدار. بۇل – cىزدەردىڭ باقىتتى ساتتەرىڭىزدىڭ ءبىرى، – دەدى مەملەكەت باسشىسى.

كەزدەسۋ سوڭىندا قاسىم-جومارت توقاەۆ شاحمات تاقتاسىنا ەستەلىك جازبا قالدىردى.