ءالي الپىسباەۆتىڭ 70 جاس مەرەيتويىنا ارنالعان مۋزىكالىق كەش

قازاقكونتسەرت تانىمال كومپوزيتور، ديريجەر، «قۇرمەت»، «پاراسات» وردەندەرىنىڭ يەگەرى، قازاقستاننىڭ ەڭبەك سىڭىرگەن قايراتكەرى الي دەمەگەن ۇلى الپىسباەۆتىڭ 70 جاس مەرەيتويىنا ارنالعان مۋزىكالىق كەش وتكىزەدى، دەپ حابارلادى «جەتىسۋ وبلىسىنىڭ دانەش راقىشەۆ اتىنداعى فيلارمونياسى» مكقك.

كونتسەرتتىك باعدارلامادا كومپوزيتوردىڭ «الاش ەلى»، «توسبۇلاق» كۇي-پوەمالارى، «اكە»، «اققۋىم بولىپ ورالدىڭ با؟»، «جۇلدىز — عۇمىر»، «امان بولشى، جان انا»، «باقىت ءۆالسى»، «ماحاببات ءۆالسى»، «قازاق ەلى» اندەرى مەن باسقا دا تۋىندىلارى ورىندالادى.

ءىس-شاراعا «كۇرەڭبەل» تريوسى، حالىقارالىق بايقاۋلاردىڭ لاۋرەاتى مەدەت ەسبەرگەنوۆ، سونداي-اق، جومارت تاكەباەۆ، ماقسات نۇرلانوۆ، تالعات ورازاەۆ، تولقىن سكاكوۆا، سالتانات مۇراتقىزى، شاحزود سانا، گۇلبانۋ لاحاەۆا،  اقبوتا سابىرجانوۆا، ساۋلە اليمبەتوۆا، ارۋجان جالعاسوۆا مەن دانەش راقىشەۆ اتىنداعى جەتىسۋ وبلىستىق فيلارمونياسىنىڭ ەسترادالىق-سيمفونيالىق وركەسترى قاتىسادى، — دەلىنگەن حابارلامادا.

ءالي الپىسباەۆ 50-دەن استام ءان جانە جەكە مۋزىكالىق اسپاپتارعا ارنالعان تۋىندىلار جازدى. ونىڭ شىعارماشىلىعى ۇلتتىق ءداستۇر تەرەڭدىگىمەن جانە زاماناۋي مۋزىكالىق اۋەنىمەن ەرەكشەلەنەدى. ول مۇقان تولەباەۆ اتىنداعى حالىقارالىق «التىن تاياقشا» ديريجەرلەر بايقاۋى مەن «كەستەلى ورامال» ۆوكالشىلار بايقاۋىنىڭ ۇيىمداستىرۋشىسى. «ەلگە ارناۋ» پوەماسى بويىنشا مادەنيەت جانە اقپارات مينيسترلىگىنىڭ مەملەكەتتىك گرانتىنىڭ لاۋرەاتى جانە «ەلىم مەنىڭ» رەسپۋبليكالىق بايقاۋىنىڭ بىرنەشە دۇركىن جەڭىمپازى اتاندى.

2015 جىلى «تاۋەلسىزدىك تولعاۋى» اتتى VI رەسپۋبليكالىق جاڭا ونەر تۋىندىلارى بايقاۋىنا قاتىسىپ، «وربۇلاق تاڭى» سيمفونيالىق كۇي پوەماسىمەن گران-پري يەلەندى. كومپوزيتوردىڭ شىعارماشىلىق قىزمەتى حالىقارالىق دەڭگەيدە دە جەتىستىكتەرگە جەتتى. ول رەسەي، قىتاي جانە تۇركيا سياقتى ەلدەردە گاسترولدىك ساپارمەن بولىپ، حالىقارالىق ارەنادا ءوز ونەرىن پاش ەتتى. سونىمەن قاتار، پولشادا وتكەن 8-ءشى دۇنيەجۇزىلىك ونەر فەستيۆالىندە جوعارى كاسىبي دەڭگەيىن كورسەتىپ، ەلدەر اراسىنداعى مادەني بايلانىستاردى نىعايتۋعا ۇلەس قوستى.

وتەتىن ورنى: استانا ق.، ماڭگىلىك ەل، 10/1، QAZAQCONCERT

كۇنى: 17 ناۋرىز، 2026

ۋاقىتى: 19:30

بايلانىس تەلەفونى: +7 701 342 19 88