SportPress.kz قازاقستان سپورت جاڭالىقتارى
ءبيبىسارا اساۋباەۆا اقش-تىڭ سەنت-لۋيس قالاسىندا ءوتىپ جاتقان Cairns Cup 2026 تۋرنيرىندە العاشقى جەڭىسىنە جەتىپ، كوشباسشىلار قاتارىنا قوسىلدى.
4-تۋردا شاحماتشى اق فيگۋرالارمەن ويناپ، شۆەيتساريا اتىنان ونەر كورسەتەتىن ەكس-الەم چەمپيونى الەكساندرا كوستەنيۋكتى 23 جۇرىستە جەڭدى. بۇل — اساۋباەۆانىڭ تۋرنيردەگى العاشقى جەڭىسى.
العاشقى ءۇش تۋردا وتانداسىمىز ۋكراينانىڭ وكىلى اننا مۋزىچۋكپەن، ءۇندى رامەشبابۋ ۆايشاليمەن جانە امەريكالىق ەليس ليمەن تەڭ تۇسكەن.
ءتورت تۋردان كەيىن اساۋباەۆا 2،5 ۇپايمەن 4-ورىندا كەلەدى. تۋرنير كوشىن 3،5 ۇپايمەن قىتايدىڭ ەكس-الەم چەمپيونى تان چجۋني باستاپ تۇر.
بۇعان دەيىن ءبيبىسارا اساۋباەۆانىڭ اقش-تا ءوتىپ جاتقان تۋرنيردە قاتارىنان ءۇشىنشى رەت تەڭ ويناعانىن حابارلاعان ەدىك.
وسى تۋرنيردەن كەيىن شاحماتشى 15–27 قىركۇيەك ارالىعىندا وزبەكستاننىڭ سامارقاند قالاسىندا وتەتىن 46-دۇنيەجۇزىلىك شاحمات وليمپياداسىنا قاتىسادى.
حالىقارالىق شاحمات فەدەراتسياسى (فيدە) وليمپياداعا قاتىساتىن قازاقستان ايەلدەر قۇراماسىنىڭ ءتىزىمىن جاريالادى.
وليمپيادانىڭ اشىلۋ سالتاناتى 15 قىركۇيەكتە بولادى. ال 16–27 قىركۇيەك ارالىعىندا شاحماتشىلار كلاسسيكالىق ۋاقىت باقىلاۋىمەن شۆەيتساريالىق جۇيە بويىنشا 11 تۋر وينايدى.
ءبيبىسارا اساۋباەۆا الاتاقتاداعى جەڭىستەرىنىڭ ارقاسىندا ەلدىڭ قۇرمەتىنە دە يە بولىپ كەلەدى. ول بيىل ءىى دارەجەلى «بارىس» وردەنىمەن ماراپاتتالدى. ناگرادانى مەملەكەت باسشىسىنىڭ اتىنان پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا تابىس ەتتى.
بۇعان دەيىن، 2024 جىلدىڭ قازان ايىندا رەسپۋبليكا كۇنى قارساڭىندا شاحماتشى ءىىى دارەجەلى «بارىس» وردەنىمەن ماراپاتتالعان بولاتىن.
