SportPress.kz قازاقستان سپورت جاڭالىقتارى
نۇرقوجا قايپانوۆ كۇرەستەن استانادا وتكەن الەم چەمپيوناتىنىڭ فينالىندا بەلدەسىپ، كۇمىس جۇلدەگەر اتانعانى بەلگىلى. ول فينالداعى كۇرەسى تۋرالى ءوز ويىن ايتتى.
«بەلدەسۋ مەن ءۇشىن وتە قيىن بولدى. نەگىزى كۇرەسكە تولىق دايىن بولدىم. الايدا وزىمە شامادان تىس جاۋاپكەرشىلىك العان سياقتىمىن. اسىرەسە كوماندالاستارىمنىڭ جەڭىلىسىنەن كەيىن اۋىرتپالىق تۇسكەندەي بولدى. ەندى قازاق حالقىن قۋانتقىم كەلدى. بىراق فينالدا رەسەي بالۋانى باسىم ءتۇستى.
بوزكىلەمگە شىققان ساتتە قاتتى قيىن بولدى. جاۋاپكەرشىلىكتىڭ سالماعى اسەر ەتتى مە، ايتەۋىر اياق-قولىم ىستەمەي قالدى. دەگەنمەن بۇل جەڭىلىستەن كەيىن توقتاپ قالمايمىز. ءارى قاراي ەڭبەك ەتەمىز. الدىمىزدا الەم چەمپيوناتى مەن وليمپيادا ويىندارى كۇتىپ تۇر»، دەدى ول.
ول الداعى ۋاقىتتا دا وسى سالماق دارەجەسىندە كۇرەسە بەرەتىنىن ايتتى.
«ءتورت جارىس قاتارىنان وسى سالماقتا كۇرەستىم. سوندىقتان ءالى دە ءوزىمدى دالەلدەپ، بيىك بەلەستەردى باعىندىرۋىم كەرەك.
ءوز ەلىمىزدە، جانكۇيەرلەرىمىزدىڭ الدىندا كۇرەسۋ مەن ءۇشىن ۇلكەن باقىت. وسىدان جەتى جىل بۇرىن وتكەن الەم چەمپيوناتىندا دا كۇمىس جۇلدەگەر اتانعان ەدىم. بۇل جولى دا قازاق حالقىنىڭ ەرەكشە قولداۋىن سەزىندىم. سول ءۇشىن بارشا جانكۇيەرگە العىس بىلدىرەمىن»، دەدى قايپانوۆ.
بيىلعى الەم چەمپيوناتىندا قازاقستان قۇراماسى بەس مەدال جەڭىپ الدى. ونىڭ ىشىندە ءبىر كۇمىس جانە ءتورت قولا جۇلدە بار. ۇلتتىق قۇراما جالپىكوماندالىق ەسەپتە 15-ورىنعا يە بولدى.
داستان كەنجالين،
استانا
