تۇلەكتەردىڭ تاۋەلسىزدىك كۇنىنە تارتۋى

قايتا ورالاماس ستۋدەنتتىك شاقتارىن بىرگە وتكىزگەن دوستارىڭ ەسىڭنەن ماڭگى كەتپەيدى. سول ءبىر جالىن اتقان جاس كەزدە ءومىردىڭ قىزىعى مەن شىجىعىن بىرگە وتكەرگەن دوستارىنان كەيبىر ازاماتتار قول ءۇزىپ ارالاسپاي كەتسە، كەيبىرى  تىپتى وتباسىلارىمەن ارالاسىپ كوپكە ۇلگى بولىپ ءجۇر.

ورالحان بوكەەۆ: «سابەڭ ۇلكەن ءبىلىم بەرەر ورتا مەكتەپ بولسا، مۇقاڭ اكادەميا عوي. مەكتەپتە ءبارى وقىپ شىعادى، ال، اكادەمياعا ەكەنىڭ ءبىرى تۇسە المايدى»، دەگەن ەكەن. سول سەكىلدى راسىمەندە جوعارى وقۋعا  ساۋاتى زور، ءبىلىم ۇشقىر جاستار تۇسەدى دەسەك، ءبىزدىڭ اڭگىمە ەتكەلە وتىرعان 1979 – 1983 جىلعى قازاقتىڭ دەنەشىنىقتىرۋ جانە سپورت ينيستيتۋتىنىڭ تۇلەكتەرى سول كەزدە ءبىلىم قۋىپ كەلىپ، باستارى ءبىر وقۋ ورداسىندا قوسىلعان جاستارى بولاتىن.

بۇگىندە سول وزدەرى وقىپ تامامداعان ينستيتۋتتىڭ بىلىكتى ماماندارى رەتىندە بارلىعى سپورت سالاسىندا ەڭبەك ەتىپ كەلەدى. ولاردىڭ ءجيى كەزدەسىپ، وتكەن كۇندەرىن ساعىنا ەسكە الىپ، كۇن ۇزاق اڭگىمە ايتىپ وتىرىپ قالاتىن كەزدەرى دە بولادى. ال، بۇگىنگى باس قوسۋلارىن ەرەكشە دەپ ايتۋعا بولادى. ويتكەنى، الدا كەلە جاتقان تاۋەلسىزدىك كۇنىنە وراي 1983 جىلدىڭ تۇلەكتەرى تۇگەلدەي جينالىپ،  كاركەن احمەتوۆ اتىنداعى وليمپيادا رەزەرۆى رەسپۋبليكالىق مامانداندىرىلعان مەكتەپ-ينتەرنات كوللەدجىنە كەلىپ، مەكتەپ اۋلاسىنداعى «دوستىق اللەياسىنا» قاز-قاتار شىرشالار وتىرعىزدى.

وسىنداي ىسكە ۇيىتقى بولعان ايتۋلى مەكتەپ-ينتەرناتتىڭ ديرەكتورى سەيىلحان باقتىعالي ۇلى قاراقوۆتىڭ ءوزى بەل شەشىپ كىرىسكەن يگىلىكتى شارا، كوڭىلدى كۇيمەن  جاراسىمىن تاپتى.

«كەشەگى جاس، بۇگىن دانا»، دەمەكشى 1983 جىلعى تۇلەكتەردىڭ ارقايسىسى ءار سپورت  ءتۇرىن اياقتاپ، جاسوسپىرىمدەرگە بار تاجىربيەلەرىن ۇيرەتىپ جۇرگەن ءوز سالاسىنىڭ بىلىكتى ماماندارى. ايتالىق، سەيىلحان قاراقوۆ – سامبو، دانارا بايدوسوۆا (اتى ايگىلى قابدەن بايدوستىڭ تۋعان قىزى) – سەمسەرلەسۋ، لەونيد پاك– بوكس، يۋري كۋزمين – فۋتبول، دۋلات تۇرلىحانوۆ پەن جاڭاباي وسپانوۆ – گرەك-ريم كۇرەسى،  ۆلاديمير دوستاۆالوۆ – سپورتتاعى قاۋىپسىزدىكتى قامتاماسىز ەتۋ، بۇگىندە توتەنشە جاعدايلار قىزمەتىنىڭ پولكوۆنيگى، زەينەتتە. مىنە، وسىنداي قازاق سپورتىنىڭ دامۋىنا بار ۇلەسىن قوسىپ جۇرگەن اتپال ازماتتار وزدەرىنىڭ جوعارى وقۋ ورنىن وقىپ بىتىرگەندەرىنە 40 جىل تولۋ قارساڭىندا  وسىنداي شىرشا وتىرعىزىپ كوپكە ۇلگى-ونەگە بولىپ وتىر.

نەگىزى حاديستە، «وتاۋ تىك، اعاش وتىرعىز، ۇرپاق ءوسىر»، دەگەن اسىل سوزدەر بار. راسىمەندە، اعاش وتىرعىزۋ ول اينالانىڭ اۋاسىن تازارتىپ قانا قويماي بولاشاق ۇرپاق ءۇشىن يگىلىگى زور ءىس. سوندىقتان دا، تاۋەلسىزدىك كۇنىنە قاتىستى اعاش وتىرعىزعان 1983 جىلعى تۇلەكتەردىڭ بۇل قادامىن «جارايسىزدار اعالار!»، دەپ قول سوقسا بولار. ىنتىماعى  ۇيىسقان اعا بۋىنداردىڭ جۇمىلا، جابىلى تىككەن شىرشالارى بولاشاقتىڭ شىرشاسى بولىپ ماڭگى قالارى ءسوزسىز. ۇرپاققا ۇلگى وسىنداي ىزگى شارالار كوپ بولسا ەكەن.

اقىن ورداباي ۇلى،

الماتى