اق تىلەكتەر اعىلعان كۇن

اقتوبە قالاسىنداعى «التىن وردا» مەيرامحاناسىندا «سپورت جۇلدىزدارى» رەسپۋبليكالىق جۋرنالىنىڭ باس رەداكتورى مۇساعالي تاسقاليەۆتىڭ 50 جاسقا تولعان مەرەيتويى جانە شىعىس قىزدارىنان شىققان كەڭەس وداعىنىڭ تۇڭعىش باتىرى مانشۇك مامەتوۆاعا ارنالعان «مانشۇك – قايسار، قاھارمان» ءانىنىڭ تۇساۋكەسەرى مەن قازاقتان شىققان كەڭەس وداعىنىڭ باتىرلارى تۋرالى جازىلعان «ۇلت باتىرلارى» كىتابىنىڭ تانىستىرىلىمى بولىپ ءوتتى.

مۇساعالي سابىرعالي ۇلىنىڭ 50 جاسىنا التاي مەن اتىراۋدىڭ اراسىن الىپ جاتقان كەڭ بايتاق ەلىمىزدىڭ تۇكپىر-تۇكپىرىنەن ەلگە سىيلى قۇرمەتتى قوناقتار كەلىپ، اعامىزدىڭ تويىنا قاتىستى. ەلدەگى كارانتيندىك جاعداي بولماعاندا بۇدان دا كوپ قوناقتار كەلەتىنى ءسوزسىز ەدى. سانيتارلىق جاعدايعا بايلانىستى ادام سانى شەكتەۋلى بولدى.

اقتاۋ قالاسىنان وسى كەشكە «شاعىراي» قورى اتىنان ارنايى كەلگەن قۇرمەتتى قوناعىمىز مانشۇك مامەتوۆاعا ارنالعان ءاننىڭ جازىلۋىنا سەبەپكەر بولعان ازامات جانە «ۇلت باتىرلارى» كىتابىنا دەمەۋشىلىك جاساعان سپورت پەن ونەر جاناشىرى  ايتقالي ىزماقوۆ ەسىمى ەلگە بەلگىلى جازۋشى پەرنەباي دۇيسەنبين مەن مۇساعالي تاسقاليەۆتىڭ بىرىگىپ جازعان  «ۇلت باتىرلارى» كىتابىن تانىستىرىپ، مانشۇككە ارنالعان ءان اۆتورلارى مۇساعالي تاسقاليەۆ پەن ورىنگۇل يسماعۇلوۆاعا سىي-سياپات جاساپ، مانشۇك ۇرپاقتارى اتىنان ات مىنگىزدى.

«قوس شىنار» ءاليا-مانشۇك اتىنداعى قوعامدىق بىرلەستىك توراعاسى، «قۇرمەت» وردەنىنىڭ يەگەرى، اقتوبە وبلىسىنىڭ قۇرمەتتى ازاماتى عالىمجان بايدەربەس توي يەسىنە بىرلەستىك اتىنان «ءاليا-مانشۇك» مەدالىن تاعىپ، مانشۇك انىنە اق باتاسىن بەردى.

الماتىدان ارنايى وسى تويعا كەلگەن «ەر نامىسى» قوعامدىق بىرلەستىگىنىڭ  توراعاسى ەربولات اليادين ۇلى مەرەيتويعا كەلگەن اتاقتى سپورتشىلارعا « ۇلى دالا باتىرى» مەدالىن تابىس ەتتى.

قۇرمەتتى قوناقتار اراسىندا استانادان كەلگەن وڭتۇستىك قازاقستان وبلىسىنىڭ قۇرمەتتى ازاماتى، قازاق كۇرەسىن الەمگە تانىتقان نار تۇلعا سەرىك ادام ۇلى تۇكيەۆ مەرەيتوي يەسىن دۇنيەجۇزىلىك قازاق كۇرەس فەدەراتسياسىنىڭ التىن مەدالىمەن ماراپاتتاپ، قازاقتىڭ داستۇرىمەن شاپان جاۋىپ، ات مىنگىزدى.

اقتوبە وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى نۇربول سىدىقوۆ مۇساعالي اعامىزعا اقتوبە وبلىسى اكىمىنىڭ ءبىرىنشى ورىنباسارى نۇرجاۋعان قالاۋوۆتىڭ اتىنان العىس حات پەن وبلىستىق سپورت باسقارماسى اتىنان سىي-سياپات جاسادى.

«نەۆادا-سەمەي» حالىقارالىق انتيادرولىق قوزعالىسى، باتىس فيليالىنىڭ ديرەكتورى، «قۇرمەت» وردەنىنىڭ يەگەرى ىزىمعالي كوبەنوۆ مۇساعالي سابىرعالي ۇلىنىڭ 50 جاسىنا ارنايى جىبەرگەن الەمگە تانىمال ولجاس سۇلەيمەنوۆتىڭ قۇرمەت گراموتاسىن تابىس ەتسە، اقتوبە وبلىسى بويىنشا قازاق كۇرەسىنەن شىققان تۇڭعىش سپورت شەبەرى، ايتەكە بي اۋدانىنىڭ قۇرمەتتى ازاماتى، ق.جۇبانوۆ اتىنداعى اقتوبە وڭىرارالىق مەملەكەتتىك ۋنيۆەرسيتەتىنىڭ قۇرمەتتى پروفەسسورى زەينوللا قاجى تولەۋتاەۆ سوناۋ بىشكەكتەن جەتكەن امانات، قىرعىزستانداعى قازاق كۇرەس فەدەراتسياسىنىڭ پرەزيدەنتى نۇرقان وسموناليەۆتىڭ اتىنان مەرەيتوي يەسىنە شاپان جاۋىپ، «جىگەرلى داڭق» وردەنىمەن ماراپاتتادى.

اتىراۋ وبلىسىنىڭ ماقات اۋدانىندا 1942 جىلى كومسومولسك دەگەن اۋىل قۇرىلىپتى. كەيىن ول جەردەن نارمونداناق دەگەن مۇناي كەن ورىنى اشىلىپ، اۋىل ەل ەكونوميكاسىنىڭ دامۋىنا وراسان زور ۇلەس قوسادى. وكىنىشكە قاراي، 2010 جىلى سول ىنتىماعى جاراسقان اۋىل مۇناي كوزىنىڭ تارتىلۋىنا بايلانىستى تاراپ كەتىپتى. سول اۋىلدا تۋىپ-وسكەن ازاماتتار وزدەرىنىڭ تۋعان جەرىن ۇمىتپاي، 2019 جىلى اۋىلعا ارناپ ەسكەرتكىش تۇرعىزادى. ەسكەرتكىشتىڭ اۆتورى – باتىربەك قانباەۆ.

اۋىل ازاماتتارىنىڭ ءوتىنىشى بويىنشا مۇساعالي سابىرعالي ۇلىنىڭ جۇبايى ورىنگۇل جەڭگەمىز جاقىندا سول جىرعا ءان جازىپ شىققان بولاتىن. بۇگىنگى كەشتە سول ءاننىڭ دە تۇساۋى كەسىلىپ، باتىربەك قانباەۆ اعامىز اۋىل ازاماتتارى اتىنان ءان اۆتورىنا ريزاشىلىعىن ءبىلدىردى.

مەرەيتوي قوناقتارى  قاتارىندا بوكستان الەم چەمپيونى گاليب جافاروۆ، دجيۋ-دجيتسۋدان ەكى دۇركىن الەم چەمپيونى تىنىس بيساليەۆ سەكىلدى ەسىمدەرى التى الاشقا تانىمال سپورتشىلار مەن مۇسەكەڭنىڭ دوستارى، ارىپتەستەرى، ونەر يەلەرى، «شولپى» كلۋبىنىڭ مۇشەلەرى بولدى. ولاردىڭ ءبارىنىڭ ەسىمىن بۇل قىسقاشا اقپاراتتا   جازىپ شىعۋ مۇمكىن ەمەس. ءبارى دە ەلگە سىيلى ازاماتتار، الاشتىڭ يگى جاقسىلارى.

قۇتتىقتاۋلار مەن سىي-سياپاتقا دا سان جەتپەيدى. مۇساعالي سابىرعالي ۇلى تۋىپ-وسكەن باتىس قازاقستان وبلىسى، كازتالوۆ اۋدانىنىڭ اكىمى ا.ەساليەۆ، «سپورت جۇلدىزدارى» جۋرنالى گازەت بولىپ شىققاندا ەڭ ءبىرىنشى سانىنا اق باتاسىن بەرگەن ارداقتى ازامات، بۇگىندە  اقتوبە وبلىسى، ىرعىز اۋدانىنىڭ اكىمى ءا.اۋەلباەۆ پەن اتىراۋ ايماقتىق دەنە تاربيەسى مەن سپورتتى دامىتۋ ورتالىعىنىڭ ديرەكتورى س.جەكەنوۆ وزدەرىنىڭ قۇتتىقتاۋ  حاتتارىن جىبەردى. قىسقاشا ايتقاندا اق تىلەكتەر اعىلعان كۇن بولدى!

كەش بارىسىندا مۇساعالي تاسقاليەۆتىڭ سوزىنە جازىلعان اندەر ورىندالىپ، مەرەيتويدىڭ مەرەيىن اشا تۇسسە، ورىنگۇل جەڭگەمىز وتاعاسىنا ارناپ جازعان «تۋعان كۇن» انىمەن شاشۋ شاشتى. مۇسەكەڭ دە قاراپ قالماي جەڭگەمىزگە ارناپ ءوزى ءانى مەن ءسوزىن جازعان «ءبىر ءوزىڭسىڭ» ءانىن ءوزى ورىنداپ بەردى.

وسىلايشا ەل ءۇشىن ەڭبەك ەتىپ، سپورت پەن ونەردى قاتار الىپ جۇرگەن ازاماتتىڭ ەردىڭ جاسى 50-گە كەلگەن مەرەيتويى ءوتىپ، ەل العىسىنا بولەندى. مۇساعالي سابىرعالي ۇلىنا كەلگەن جاسىڭىز قۇتتى بولسىن، اللا تاعالا سىزگە بۇل ومىردەگى بار جاقسىلىقتى ءناسىپ ەتسىن دەيمىز! قاجىماس قايرات جانە شىعارماشىلىق شابىت پەن تابىس تىلەيمىز!

ەركىن سەرىكقالي ۇلى،

اقتوبە