استانادا دزيۋدو ورتالىعى اشىلدى

بۇگىن «نۇر-سۇلتان» وليمپيادالىق دايارلاۋ ورتالىعىندا دزيۋدو ورتالىعىنىڭ اشىلۋ سالتاناتى ءوتتى. بۇل تۋرالى مادەنيەت جانە سپورت مينيسترلىگى سپورت ىستەرى جانە دەنەشىنىقتىرۋ كوميتەتىنىڭ ءباسپاسوز قىزمەتى حابارلادى.

ءىس-شاراعا مادەنيەت جانە سپورت ۆيتسە-ءمينيسترى ساكەن مۇسايبەكوۆ پەن قازاقستان دزيۋدو فەدەراتسياسىنىڭ پرەزيدەنتى قايرات قوجامجاروۆ جانە «نۇر-سۇلتان» ودو» ديرەكتورىنىنىڭ مىندەتىن اتقارۋشى مۇراتبەك قىپشاقباەۆ قاتىستى.

قايرات پەرنەش ۇلىنىڭ العىسوزىنەن كەيىن جاس دزيۋدو شەبەرلەرى جاتتىقتىرۋشى سەرگەي پاكتىڭ باسشىلىعىمەن از ۋاقىت ارالىعىندا ۇيرەنگەن ونەرلەرىن كورسەتتى.

«سارىارقا» ۆەلوترەگى جانىنداعى دزيۋدو ورتالىعى 2020 جىلدىڭ قاراشاسىنان  جۇمىس ىستەپ كەلەدى. قازىر وندا 120-دان اسا ادام جاتتىعىپ ءجۇر. ورتالىقتا دايىندىق جۇمىستارى اپتاسىنا 6 كۇن وتەدى. ەكى باپكەر بار. سانيتارلىق تالاپتار قاتاڭ ساقتالعان.

جاپون جەكپە-جەگىنە دەگەن قىزىعۋشىلىق وتە جوعارى. وسىنى ەسكەرگەن وليمپيادالىق دايارلاۋ ورتالىعىنىڭ باسشىلىعى ونىڭ اۋقىمىن كەڭەيتىپ، بارلىق قاتىسۋشىلارعا جايلى جاعداي جاساۋعا تىرىستى. قازىر نەگىزگى زالدىڭ كولەمى 410،4 شارشى مەتر. بۇل ءبىر مەزەتتە 100 ادامنىڭ ەمىن-ەركىن دايىندالۋىنا مۇمكىندىك بەرەدى. ال، ورتالىقتىڭ جالپى اۋماعى 721،2 شارشى مەتردى الىپ جاتىر. بۇل جەرگە كيىم اۋىستىراتىن جانە باسقا دا بولىمدەر كىرەدى.