«ىبىرايدىڭ ىزىمەن» اتتى نۇر-سۇلتان – قوستاناي ۆەلوشەرۋىنىڭ اتتانۋ ءراسىمى

بۇل ۆەلومارافون تاۋەلسىزدىگىمىزدىڭ 30 جىلدىعىنا، ىبىراي ءالتىنساريننىڭ 180 جىلدىعىنا جانە ىبىراي التىنسارين اتىنداعى ۇلتتىق ءبىلىم اكادەمياسىنىڭ 100 جىلدىعىنا، سونداي-اق ەلىمىزدەگى بارلىق ۇستازدار قاۋىمىنا ارنالادى.    

«نۇر-سۇلتان – قوستاناي» ۆەلوشەرۋى 23 تامىز كۇنى، دۇيسەنبىدە،  تاڭەرتەڭگى ساعات 09. 00-دە نۇر-سۇلتان قالاسىنداعى ىبىراي التىنسارين كوشەسىنىڭ بويىنداعى ىبىراي التىنسارينگە ورناتىلعان تاقتاتاس جانىنان باستاۋ الادى. اتتاناتىن جەردىڭ ناقتى مەكەنجايى – ءىلياس ەسەنبەرلين كوشەسى، 20/1 ءۇي. وسى ءۇيدىڭ قابىرعاسىندا ىبىراي التىنسارينگە ارنالعان تاقتاتاس بار.

قاتىسۋشىلاردىڭ بارلىعى – اۋەسقوي ۆەلوشاباندوزدار. ماماندىقتارى ءارتۇرلى. مۇعالىم، جۋرناليست، زەينەتكەر. ۆەلومارافونشىلار مەملەكەتتىك «رۋحاني جاڭعىرۋ» باعدارلاماسىن جانە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «تاۋەلسىزدىك بارىنەن قىمبات» ماقالاسىن نەگىزگە الا وتىرىپ، تاۋەلسىزدىگىمىزدىڭ 30 جىلدىعىن جانە ىبىراي اتامىزدىڭ 180  جىلدىعىن ناسيحاتتاۋعا ازاماتتىق ۇلەس قوسقىسى كەلەدى.

اشىق اسپان استىندا وتەتىن كوپ كۇندىك ۆەلوشەرۋ ەلدەگى، ايماقتاعى قازىرگى ەپيدەميولوگيالىق جاعدايعا بايلانىستى ەنگىزىلگەن سانيتارلىق تالاپتار قاتاڭ ساقتالا وتىرىپ، وتكىزىلەدى.

ءىس-شارانىڭ بىرنەشە ماقساتى بار:

1) ىبىراي ءالتىنساريننىڭ ونەگەلى ءومىرىن، باي مۇراسىن جانە ءىزباسارلارىنىڭ ەڭبەگىن ءوزىمىز تانۋ جانە تانىتۋعا، ناسيحاتتاۋعا اتسالىسۋ;

2) قالىڭ جۇرتشىلىقتى، اسىرەسە جاستاردى سالاماتتى ءومىر سالتىن ۇستانۋعا ۇندەۋ;

3) تاۋەلسىزدىكتىڭ قادىر-قاسيەتىن سەزىنۋ جانە سەزىندىرۋ، ەلدى، جەردى ءسۇيۋدى، ءپاتريوتيزمدى ناسيحاتتاۋ;

4) قورشاعان ورتانى قورعاۋعا، اينالانى، تابيعاتتى ايالاۋعا ۇندەۋ.

 

ۆەلومارافوننىڭ ۇزاقتىعى –750 شاقىرىم. ول ءبىر باعىتقا (نۇر-سۇلتان – قوستاناي) عانا جاسالىپ، 6 كۇنگە سوزىلادى.

 

ۆەلوشەرۋ باعدارى:

№	باعدار	شاقىرىم	كۇنى	اپتا كۇنى
1 كۇن	نۇر-سۇلتان – استراحان	140	23 تامىز	دۇيسەنبى
2 كۇن	استراحانكا – اتباسار	140	24 تامىز	سەيسەنبى
3 كۇن	اتباسار – جاقسى	90	25 تامىز	سارسەنبى
4 كۇن	جاقسى – وكتيابرسكوە	142	26 تامىز	بەيسەنبى
5 كۇن	وكتيابرسكوە – اۋليەكول	120	27 تامىز	جۇما
6 كۇن	اۋليەكول – قوستاناي	110	28 تامىز	سەنبى
بارلىعى:		742 (بولجالدى قاشىقتىق)
7 كۇن	نۇر-سۇلتانعا قايتۋ، پويىزبەن		29 تامىز	جەكسەنبى

 

 

ۆەلوتوپ قوستاناي قالاسىنا جەتكەن سوڭ، وسى قالانىڭ ىرگەسىندەگى ىبىراي التىنسارين كەسەنەسىنە بارىپ ۇستاز رۋحىنا دۇعا باعىشتاۋدى، ىبىراي التىنسارين مەموريالدىق مۋزەيىمەن تانىسۋدى جانە ىبىراي التىنسارين اتىنداعى مەكتەپكە بارۋدى جوسپارلاپ وتىر.

 

ۆەلوتوپ 5 ادامنان تۇرادى:

1. ەرنات مەلس ۇلى، باستاماشى (ينيتسياتور)، اعىلشىن ءتىلىنىڭ وقىتۋشى-اۋدارماشىسى. «حابار 24» تەلەارناسىندا شەتەلدىك شولۋشى. جۋرناليست. نۇر-سۇلتان قالاسىنىڭ تۇرعىنى. 2018 جىلى 500 شاقىرىمدىق «استانا – اقتوعاي»، 2019 جىلى 208 شاقىرىمدىق «قاراعاندى – جاڭاارقا»، 2020 جىلى ابايدىڭ 175 جىلدىعىنا ارناپ 1088 شاقىرىمدىق «نۇر-سۇلتان – جيدەباي» ۆەلوشەرۋلەرىن ۇيىمداستىرعان. 1982 جىلى تۋعان.
2. قايرات ىرعىزباەۆ، نۇر-سۇلتان قالاسىنىڭ تۇرعىنى، زەينەتكەر، ۇكق زاپاستاعى پودپولكوۆنيگى، پەنسيونەر، «قوستاناي ۆەلوقاۋىمداستىعىنىڭ» مۇشەسى. 2019 جىلى بۇكىل قازاق جەرىن ارالاپ، 7 مىڭنان استام شاقىرىمدى ارتتا قالدىرعان (وسى تىزىمدەگى ەرنست بايمۇحامبەتوۆ ەكەۋى). 1964 جىلى تۋعان.
3. تۇگەلبەك قاسىموۆ، الماتى قالاسىنىڭ تۇرعىنى، زەينەتكەر، ارداگەر-ۇستاز، زەينەتكەر، 76 جاستاعى اقساقال «اتوم قارۋىنا جول جوق!» دەگەن ۇرانمەن 2016 جىلى جاپونياعا ۆەلوسيپەدپەن بارعان. ول جالپى 40 ەلدى ۆەلوسيپەدپەن ارالاپ شىققان. 1945 جىلى تۋعان.
4. ەرنست بايمۇحامبەتوۆ، نۇر-سۇلتان قالاسىنىڭ تۇرعىنى، قر پرەزيدەنتىنىڭ كۇزەت قىزمەتىنىڭ (قازىرگى – قر مەملەكەتتىك كۇزەت قىزمەتىنىڭ) وتستاۆكاداعى پولكوۆنيگى، زەينەتكەر. 2019 جىلى بۇكىل قازاق جەرىن ارالاپ، 7 مىڭنان استام شاقىرىمدى ارتتا قالدىرعان (وسى تىزىمدەگى قايرات ىرعىزباەۆ ەكەۋى). 1955 جىلى تۋعان.
5. قازىبەك بەكەەۆ، نۇر-سۇلتان قالاسىنىڭ تۇرعىنى، ينجەنەر بولىپ جۇمىس ىستەگەن. زەينەتكەر. بۇعان دەيىن «پەتروپاۆل – الماتى» باعىتىندا 1800 شاقىرىمدى ۆەلوسيپەدپەن 104 ساعاتتا ءجۇرىپ وتكەن. 1954 جىلى تۋعان.

 

يگى تىلەكپەن، ۆەلوتوپ اتىنان، باستاماشى ەرنات مەلس ۇلى

بايلانىس تەلەفون نومەرى جانە ۋوتساپ: 8-702-497-49-82

فەيسبۋك: ەرنات مەلس ۇلى

ينستاگرام: @ernat_melsuly